Kiran Bedi election campaign in-charge a bang

Delhi Assembly inthlan neih tura BJP chief minister candiate, Kiran Bedi-i election campaign in-charge Narendra Tandon chu nimin khan a bang.

Tandon hian Kiran Bedi hi ama thu duh lutuk leh a duhdan ang chauha rorel tum a nih avangin a thawhpui thei tawh lo tih a sawi. Mahse BJP aṭanga banna a thehluh hi chu a hnuah a sut leh a ni.

Tandon chuan, "Campaign in-charge ka nihna aṭangin ka bang a, BJP tan erawh chuan ka thawk zel ang. Kiran Bedi-i leh a staff thu duh leh inlek lutuk hi ka ning tawh em a ni. Kan party hotu hnenah pawh ka sawi fo a, mahse tun thlengin eng thil mah an la ti lo a ni," a ti.

Kum 30 chhung zet BJP tana lo thawk tawh, Tandon hian a banna hi party president Amit Shah hnenah a thehlut. A lehkha thehluhah hian vawi tam tak BJP worker-te vua a, kut thlak tawhtu Kiran Bedi-in an chunga duh tawka ro a rel khum leh chuan a rilru a ti na hle tih a tarlang.