INDIA MP-ten eptu party rorelna state thliar hrangah sorkar puh

Eptu ṭangrual pawl, INDIA bloc MP-te chuan Union Budget 2024-25 pharh takah sorkar laipui chuan eptu party rorelna state-a thliar hrang tiin an puh. Hei vang hian nimin khan Parliament compound-ah lungawi lohna an lantir a, an zingah hian Congress president Mallikarjun Kharge, Congress parliamentary party chief Sonia Gandhi leh Lok Sabha-a leader of opposition Rahul Gandhi-te an tel.

Parliament-a lungawi lohna lantirnaah hian Congress, TMC, Samajwadi Party, DMK leh Left MP te an tel a ni. Union finance minister, Nirmala Sitharaman-i'n Thawhlehnia Union Budget a pharh tak chu sawiselin, Congress president Kharge chuan, 'Budget hi anti-people a ni, dik taka relsak tumah an awm lo. Special package te an sawi tawh a, mahse special status pek an awm chung lo. Inbumna budget, mipui tana dik lo taka relsakna budget a ni," a ti. MP rualte hian 'NDA budget ni loin India ram tan budget kan duh' tih leh, 'NDA chuan Budget hmangin India ram a phatsan a ni' tih thuziakte an keng bawk.

Congress general secretary, K.C. Venugopal chuan, "Sorkai laipui chuan a budget kaltlangin federal system vawnnunna tur zawng zawng chu a rawn bawhchhia a ni," a ti. Budget hian a tum ber chu sorkar venhim a ni, tiin BJP thawhpui JDU leh TDP sorkarna state pahnih - Andhra Pradesh leh Bihar tana thil tam tak ruahman sak an ni chu an dodal loa, mahse state dangte pawhin rorelna dik an dawng ve tur a ni, a ti. Hei hi an lawm lohna chhan pakhat a ni tih sawiin, mipuite pawh an lungawi lo tih a sawi.

SP MP Bachchan chuan budget sawiselin, ṭhalaite lakah dawt thu an tiam a ni, a ti. SP hotu, Akhilesh Yadav chuan NDA sorkar chuan an state chu a en hrang hle tih sawiin, hna tih tlem sak te an tum niin a sawi ve bawk. CPI general secretary D. Raja chuan budget thar hi kum 10 chhunga BJP rorelna hlawhchhamna thup tumna hmanrua a ni, a ti.

Congress party chuan union budget-a sorkarin internship proramme a puan chu party-in 2024 election manifesto-a 'apprenticeship' scheme an tarlan copy-a siam a ni tiin, budget pharh tak chu copycat Budget tiin an sawi. Party president Kharge chuan, 'Hei hi ram hmasawnna tura budget ni loin, Modi sorkar humhimna tur budget a ni,' a ti. Finance minister hlui leh Rajya Sabha MP P Chidambaram chuan hna nei lo, unemployment chu India ramin a buaipui nasat ber a nih mek laiin, sorkar chuan he harsatna tikiang tura hma lak tumna a nei tlem hle a ni, tiin a sawi. Hei bakah budget aṭang hian ram chhung thil man sang chak zel tihziawmna tum chungchang sorkarin a ngaihpawimawh tawk hle tih rin ngamna tur pawh an hmu lo tih a sawi bawk.

Union finance minister Nirmala Sitharaman chuan eptu party sorkarna state thliarhran bik nia puhna hi a chhang nghal bawk a, budget-ah state hming sawilan ni kher lo mah se, sorkar programme in heng state-te hi thleng lo tihna a ni lo, a ti. 'Budget tinah state zawng zawng hming tarlan theih a ni vek kher lo. Nimina budget-ah khan Maharashtra hming sawilan ni lo mah se, Maharashtra chu a ngaihthah ta tihna em ni?' tiin, eptute chuan mipuite hnenah an state tan engmah an tihsak ve lo tia lungawi lohna tuh a tumna zawk niin a puh let ve thung.