Loneitu pawl hruaituten Rahul Gandhi an hmu

State paruk - Punjab, Haryana, Uttar Pradesh, Telangana, Tamil Nadu leh Karnataka-a loneitu pawl hruaitute chuan nimin khan Lok Sabha-a leader of opposition, Congress hruaitu Rahul Gandhi an hmu a, an thil phut hrang hrang nawrna tura private member bill pu lut turin an ngen.

Nimina Parliament House Complex-a meeting an neihah hian Congress general secretary K.C. Venugopal, Punjab Chief Minister hlui Charanjit Singh Channi, Punjab Congress chief Amrinder Singh Raja Warring, Congress hruaitute - Sukhjinder Singh Randhawa,Gurjeet Singh Aujla, Dharamvir Gandhi, Amar Singh, Deepender Singh Hooda leh Jai Prakash te an tel a ni.

Loneituten MSP chungchanga an thil phut chu BJP kaihhruai NDA sorkarin a la tihhlawhtlin loh avangin nawr leh an tum thu an lo sawi tawh a, Samyukt Kisan Morcha (non-political) leh Kisan Mazdoor Morcha hruaitute chuan ram pumah prime minister Narendra Modi kaihhruai sorkar lim chu an hal dawn tih an puang. Hei bakah Parliament-a eptute member-te private bill put luh thlawpna lantirin 'long march' huaihawt an tum bawk.

India Independence Day, August 15 hian loneitute chuan an sorkar nawrna atan ram pum huapin tractor rally neih an tum a, he hunah hian criminal law thar pathum copy hal an tum bawk a ni. SKM leh KMM hruaitute chuan loneituten 'Delhi Chalo' march an neih chu August 31 hian a ni 200-na tur a ni dawn a, hemi ni hian loneitute chu Punjab leh Haryana border te thleng tura ngenin, September 1-ah Uttar Pradesh-a Sambhal district-ah mega rally neih a ni dawn tih an puang. September 15-ah Haryana-a Jind district leh, September 22-ah Pipli-ah rally hi neih chhunzawm a ni ang.