Delhi election: BJP in vision document a tlangzarh

Delhi Assembly inthlan neih tur atan political party hrang hrangte ngawrh takin an campaign zel a, nimin khan BJP chuan vision document a tlangzarh a, a tum ber chu sorkar ṭha din a ni tih an sawi. Delhi chu world class city-a din an tiam bawk.

BJP hian tun ṭum Delhi in­thlan tur pual hian manifesto siam loin, vision document zawk hi a siam dawn tih a lo sawilang tawh a ni. Vision document leh manifesto hi an danglamna a awm hran lo tih sawiin, Delhi tana hmathlir an neih leh an hnathawh tum dante an tarlang.

Vision document tlangzarhnaah hian BJP chief minister candidate Kiran Bedi chuan a thil ngaih pawimawh zual paruk a sawilang.

BJP chuan vision document-ah hian a thil ngaihpawimawh 37 a tarlang a, heng zingah hian hmeichhiate himna tur te, civic infrastructure, darkar 24 chhunga electric leh tui supply, mi tin tana chenna tur in siamsakte a tel.

Kiran Bedi chuan vision document chu sorkar laipuiin Delhi tana ruahmanna a siam nen a inzul zel tih a sawi a, union minister hrang hrangte biain Delhi tana hmathlir an neih leh, a taka kalpui an tum dante pawh a zawt kual tih a sawi.

BJP hian kuminah hian a ṭum khatna atan Delhi state puitlinga hlankai a tum thu a tarlang lo. Hemi chungchang hi kum 1993 aṭang khan buaipui ṭanin, a manisfesto-ah a telh ziah ṭhin a ni.

Congress hruaitu, hun rei tak chhung Delhi Chief Minister lo ni tawh, Sheila Dikshit-i chuan BJP vision document tlangzarhah chuan thil thar engmah hmuh tur a awm lo tih a sawi a, "Delhi khawpuia Congress sorkarin hna kan lo thawh tawhte chhunzawmna tur vek a ni," a ti. AAP pawhin vision document hi sawiselin, "BJP hian agenda hran a nei lo a, an thu lo tiam tawh power hman man 30% a tihhniam tumna chu an hlen theih loh avangin vision document hi an tichhuak a ni," a ti.

BJP Vision document-ah hian Delhi khawpuia cheng, hmar­chhak state pariat aṭanga kalte chu 'ramdang aṭanga pemlut' (immigrant) tia sawi an ni a, heng mite himna hi ngaipawimawh a ni dawn tih a sawi. Hmarchhak mite 'pemlut' tia sawi hian social media kaltlangin sawisel a tawk nasa nghal hle.

BJP vision document-a tarlan zingah hian hnam rohlu humhalh, awlsam zawka sumdawnna kalpuina tur siam, state dangte thil tihdan ṭhate entawna kalpui, sorkar project hrang hrangte uluk taka vil, eirukna do, lang­tlang sorkar siam, hmeichhiate himna dah pawimawh, Delhi khawpuia pemlutte'n harsatna an tawh ṭhinte chinfelsak, pollution level tihhniam, parking chungchanga buaina chinfel tihte tarlan tel a ni. MLA leh sorkar official-te chu mipuite an dawr theih reng tura an awm bakah, an bialte an fang fo dawn tih an sawi. CM leh minister-te chuan thawhhona leh inpawhna ṭha an neih theih nan regular takin video conference neih an tum bawk.