AAP-in an party sum hmuhna chhuichian a cho

Aam Aadmi Party (AAP) chuan an party-in fund an hmuhnate chu chhuichian a cho thu nimin khan sorkar laipui a hrilh. Sorkarin hei hi a ti ngam lo a nih chuan anmahni ngeiin investigation agency hnenah an chhui tir dawn tih an sawi.

Congress leh BJP chuan AAP fund dawn danah thil fel tawk lo a awm niin an puh a, company lem pali aṭangin sum ṭhanem tham tak an dawng niin an sawi. Company website an en aṭangin enkawlna mumal tak pawh awm lo, hlawk­na pawh nei lo an ni a, party tana sum pe thei an ni lo, an ti. Website-a a landanin, AAP fund atana cheque pali an pekah, cheng nuai 50 ṭheuh pe anga tarlan a ni, an ti.

AAP hotu Arvind Kejriwal-a chuan fund an dawn dan chu engkim langtlanga kalpui a nih thu sawiin, party pahnihte puhna chu thu dik lo a ni, a ti. Party fund an dawnna te an hrechiang duh a nih chuan Finance Minister chuan phone-in bank CEO-te a zawt thei a, awlsam taka hriat theih a ni, a ti.

AAP party bakah, Congress leh BJP fund dawn dan chu Supreme Court hnuaia Special Investigation Team (SIT) chhui tir an phut dawn tih party hruaitu, Ashish Khetan chuan a sawi. BJP leh Cong­ress hian cheng vaibel­chhe tam tak pawn lam aṭangin an dawng a ni, an ti.