Aadhaar chungchang sawichiang turin sorkar hriattir

Supreme Court chuan Thawhṭanni khan central-a NDA sorkar chu Aadhaar card pek chhuah dan chungchanga a dinhmun dik tak sawichiang tur leh, he program kalpui chhunzawm zel a tum leh tum lohte sawichiang turin a ti.

Aadhaar program hnuaiah hian ramchhunga mi tinte chu chhin­chhiahna, unique identification pek an ni.

Chief Justice HL Dattu leh Justice Ak Sikri awmna bench chuan Solicitor General Ranjit Krmar hnenah sorkar chu Aadhaar chungchangah a ngaihdan leh a dinhmun dik tak February 13-a tifiah turin an hrilh.

Bench hian senior advocate Gopal Sobramaniam-a PIL thehluh, Aadhaar scheme hi eng dan mahin a thlawp lo a, khua leh tuite privacy palzutna a ni tia a sawi avangin sorkar hi hriattirna a pe a ni. Petition thehluttu, sipai officer hlui Subramaniam chuan Aadhaar scheme ang chi hi ram tam takin an lo titawp tawh a ni tiin, sorkar laipui pawh chu he scheme hmanga data a lakkhawm zawng zawngte tichhiattir vek turin a phut. Subramaniam chuan, "Dan loa kan rama rawn lutte pawhin Aadhar card hi an nei tho a, hemi hmang hian khua leh tui diktak chauhin an dawn theih, sorkar service-te pawh an dawng thei vek a ni. UID scheme hi thil holam mai mai a ni a, he scheme kalpui hi mipuite sum a thlawna khawhralna leh, India tlin lohna pholanna mai a ni," a ti.

UID project chuan khua leh tuite leh sorkar inkarah khi a siam phah a, he thil hi thil tih ngei ngai a nihzia mipuite hnena lantir turin sorkar chuan theihna a nei tawk lo a ni, a ti.