Delhi Election: AAP vs BJP vs Congress

February 7-a Delhi Assembly inthlan neih tur atan party hrang hrangte chu ngawrh takin an campaign mek a, party lian pathum BJP, AAP leh Congress party-te an inbei na sawt hle.

AAP chuan kar hmasa khan Delhi Assembly inthlan neih tur puala manifesto a siam chu a tlangzarh tawh a, BJP chuan manifesto siam loin vision document a siam thung a, Thawhlehni khan a tlangzarh. Congress party pawhin nimin khan manifesto part 2 a tlangzarh ve leh bawk.

Party hrang hrangte hian Delhi khawpui leh mipuite tana an hnathawh leh thutiam hrang hrangte an tarlang a, party pathum zingah AAP chauhin an manifesto-ah hian state puitlinga Delhi dah tum chung­chang a tarlang.

AAP chuan power, kawngpui leh tui chungchanga a thutiamte tarlangin, power bill chu a man chanve-a tihhniam a tiam. BJP chuan a ṭul dan a zirin bill tihniam a tiam a, mahse a tihhniamna zat tur erawh a sawilang lo. Congress chuan power hman man chu unit 200-ah unit khatah Rs 1.50 zela tihniam a tiam thung.

BJP leh AAP chuan power supply campany-te chu Comptroller and Auditor General (CAG) enfiah tir an tiam a, BJP chuan consumer-te chu an company duh an thlan tir dawn tih a sawi.

AAP chuan thla tinin tui liter 20,000 a thlawna pek a tiam a, BJP in tui bill siam dan te ennawna siamṭhat tiamin, Congress chuan tui bill ba la tâng zawng zawngte ngaihdam vek a tiam bawk.

Congress chuan mi rethei venga chengte'n an dikna chanvo an chan theih ngei nan beih chhunzawm zel a tiam a, in leh lo neitu nihna an chan theihna atana theihtawp chhuah a tiam. BJP chuan phalna nei loa awm­khawmna hmunte chu enfiah a, mi retheite tan in siamsakna tur scheme kalpui a tiam.

Party pathumte hian a agenda-ah hmeichhiate himna chu an dah pawimawh vek. AAP chuan khawpui chhung a him zawkna atan CCTV nuai 15 dah a tiam a, BJP chuan public transport zawng zawngah CCTV leh GPS dah bakah, taxi pawh mumal taka enfiah a tiam. Congress chuan public transport-ah CCTV dah a tum thu leh, police force-te pawh special training pek an nih tur thu a sawi.

Eirukna dona atan Janlokpal bill siam ngei a tum leh dawn tih AAP chuan a tarlang a, Congress leh BJP pawhin eirukna laka fihlim sorkar din ngei an tiam a, mahse an hmalak tum dan kimchang erawh an tarlang tel lo.

Khawpui chhunga a thlawna Wi-Fi pekchhuah chu party pathumte hian an agenda-ah hian an telh vek.