Kejriwal-a thusawi EC in a hnawl

Aam Aadmi Party (AAP) hotu, Arvind Kejriwal-a'n Delhi assembly inthlan neih tura vote thlakna tur, electronic voting machine (EVM) te chu BJP-in an ṭhatna turin an khawih chingpen niin a sawi a, hei hi Election Commission chuan chhangletin, thu awmze nei lo a ni, a ti.

Chief Election Commissioner (CEC) HS Brahma chuan EVM te chu khawih chingpen theih a ni lo a, a him tawk tih NDTV-in a kawmnaah a sawi a, "Hetianga inpuhna chungchang hi a hma pawhin chhuichian a lo ni tawh ṭhin. Thu dik lo thehdarh tum hi mipuite hian an ngai thutak tur a ni lo," a ti.

Kejriwal hian Thawhlehni khan Delhi Cantonment area-ah EVM pali-te chu khawih danglamin, engpawh hmet se BJP chakna turin a lut zel niin a sawi. Mahse a thusawi hi EC in a pawmsak loh bakah, BJP chuan AAP sum hmuh dan dik loa puhna awm mek boruak thlak danglam a tumna mai niin an sawi.

Finance Minister Arun Jaitley chuan AAP chu an dinhmun a ṭhat loh avangin chhuanlam tur an zawngkual tawh a, party dangte leh EVM-te puhchhiatna tur an zawng ṭan a ni, a ti. "Mi zawng zawng chu an rinawm lo a ni tiin Supreme Court-ah pawh chhui chian tir tumin an la kal ang," a ti.