Rahul Gandhi-a'n Natarajan puhna a chhang let

Congress vice-president Rahul Gandhi chuan tun hnaia Congress party chhuahsantu, Union Minister hlui Jayanthi Natarajan-i puhna a chhang let.

Natarajan-i hian UPA sorkara environment minister a nih laiin project tam tak tihkhawtlai leh dan a nih chung­changah Rahul Gandhi a hi a inrawlh niin a puh. Hei hi chhangin Rahul chuan, "Natarajan hi min bei turin Prime Minister Narendra Modi-a'n a ti a ni. Natarajan hi minister a nih lai khan tribal leh mi rethei zawkte venghim tur leh, an ṭhatna tura thawk turin ka hrilh a ni. Politics hi mi hausate tan ka khel lo a, mi rethei zawkte'n an dikna chanvo dik tak an hmu theihna turin ka khel a ni," a ti.

Rahul Gandhi chuan Nataranjan hnenah hian tribal biala project thawh phalna a pek hmain hna thawh tur chuan eng angin nge mi retheite chungah nghawng a neih dawn tih enfiah hmasa phawt tur leh, chumi hma chuan pawmsak mai lo tura a hrilh thu a sawi.

Congress party chuan tribal leh mi rethei zawkte mi duham leh pamhamte laka aṭanga venhim leh an dikna chanvote humhalh sak chu thil pawimawh leh ṭul a ni tih an tarlang.

Lok Sabha inthlanpui neih dawna PM Modi-a'n ram mipuite hnena thu tam tak a tiam chungchangah Rahul-a chuan, "Thu a tiam lai khan mi pakhat chauhin India ram hi a thlak danglam thei lo ang ka lo ti tawh a ni," a ti.

Modi chuan India rama thilsiamte chawilar tuma 'Make In India' campaign a kalpui mek laiin, Republic Day-ah suit man to tak a ha a, chu pawh chu India-a siam ni loin UK-a siam a ni tiin Rahul chuan a sawi.

BJP chu mi hausate tana ṭhian ṭha a ni tiin, Congress vice president Rahul chuan a sawi a, mipuite chu BJP leh AAP-te thutiam dik loa inawk buai lo turin a chah.