CPI (M) in AAP a thlawp dawn

Communist Party of India (Marxist) CPI(M) chuan Delhi Assembly inthlan neih turah BJP leh Congress te'n thuneihna an chang tur danna atan Aam Aadmi Party (AAP) thlawp a tum tih nimin khan a puang.

CPI(M) hian assembly seat 70 awmah seat 15-ah chauh chuh a tum a, an party-in candidate an siam lohna bial dangah chuan AAP an thlawp dawn niin party general secretary Prakash Karat chuan a sawi.

Karat chuan, "Kan tum ber chu Congress leh BJP in thuneihna an chang tur lo dan hi a ni a, a bik takin kan ram khawpui ber Delhi-ah hian BJP sorkar a din kan duh lo a ni," a ti.

Zee Media leh Taleem Research Foundation-te'n mipui ngaihdan an lak hnuhnung ber, nimina tihchhuahah AAP hian hma a hruai mek. Mipui ngaihdan lakah hian AAP chu seat 34 la tura rin niin, BJP chuan seat 32 a lak rin a ni. Chief Minister atan pawh AAP hotu Arvind Kejriwal-a duhtu an tam ber a, vote thlak zinga 49% in Kejriwal hi CM atana a ṭhat ber an ring a, BJP CM candidate Kiran Bedi duhtu chu 40% niin, Congress hruaitu Ajay Maken chu 10% in an duh bawk.

Kum 2013 assembly inthlanah khan BJP hian seat 31, AAP-in 28 leh Congress in seat 8 an la a ni.