Sorkar laipuiin Home Secretary a ban, a thlaktu tur ruat nghal

Sorkar laipui chuan Home Secretary Anil Goswami chu Saradha Group-in investor-te sum tam tham tak a tihchingpen kaihhnawih­ah union minister hlui, Matang Sinh manna tur lo dan a tum nia puhna vagin a ban. Goswamni thlaktu tur hian LC Goyal chu ruatin, a ni hian nimin khan a hna thar a zawm nghal.

Nilaini zan khan sorkar chuan thuchhuah siamin, Home Secretary thar atana Goyal ruat a nih thu leh, kum hnih chhung he hna hi a chelh tur thu a tarlang. LC Goyal hi 1979 batch IAS officer a ni.

Thuchhuah chuan, "Appointments Committee of the Cabinet (ACC) chuan home secretary atana Department of Rural Development secretary, LC Goyal, IAS ruatna chu a pawm a, a term kum hnih hi Anil Goswami hnen aṭanga charge a lak ni aṭangin chhiar ṭan a ni ang," a ti.

Goyal hi kum 2002-2007 chhung khan home ministry-ah joint secretary (internal security) hna a lo chelh tawh a ni.

Goswami hian ACC hnenah voluntary pension dilna a thehlut a, hei hi pawmsak nghal a ni bawk.

Jammu and Kashmir cadre IAS officer, Goswami hi sorkar hmasa, Congress kaihhruai UPA sorkar laia home secretary atana ruat a ni. CBI-te'n Saradha sum tihchingpen thubuai an chhuina kal zelah, Congress minister hlui Matang Sinh man an tum chungchangah CBI officer-te a lo ti tipui nia puh a ni.