Delhi-ah Kristian te'n nawrh an huaihawt

Delhi khawpuia Kristian awmte chuan tun hnaia Kristiante biak-in beih leh suasam a nih fo avanga lungawi lohna lantirin nimin khan Home Minister Rajnath Singh-a in panin kawng an zawh.

Kawngzawh hi Central Delhi-a Sacred Heart Cathedral tual aṭangin Union Minister Singh in inkarah neih a ni a, tel an ṭhahnem hle.

Mipui kalkhawmte hian rorelna dik an duh thu an aupui a, minister in pan an tum laiin police-te chuan lo dangin biak-in compound-ah hnawhkir an tum a, nawrh huaihawt zinga mi eng emaw zat an man bawk, tam tak chu bus chhungah an nawr lut bawk a, an zingah hian puithiamte pawh an tel. Bus-a an nawr luh zingah hian Delhi Catholic Archdiocese thupuangtu, Father Dominic Emanuel pawh a tel.

Nawrh huaihawtnaa tel puithiam pakhat chuan bo­ruak muanawm tak hnuai­a kawng an zawh laia an chung­a police-te chetdan chu an hriatthiam loh thu a sawi.

Hetihlai hian police officer Mukesh Kumar Meena chuan mipui pungkhawmte hian nawrh huaihawt turin phalna an nei lo a, Home Minister chenna in panin kawng an zawh ngawt thei lo a ni tiin VIP-te chu an venhim a ṭul thu a sawi.

Home Minister Rajnath Singh chuan tun hnaia Delhi-a biak-in hrang hrang beih a nih chungchang chu uluk taka chhuichian a nih tur thu sawiin, biak-inah pawh venhimna ṭha zawk pek a tiam thu a tarlang. Kristian pawl aiawh aṭang­in mi panga leh senior police officer panga te'n biak-ina security pek a nih dan tur chungchang hi an la sawiho ang.