Vawiinah Delhi Assembly inthlang dawn

Vawiin hian Delhi Assembly inthlan neih a ni dawn a, assembly bial 70 ah mipuite'n an aiawh tur an thlang ang. Zing dar 8 aṭanga tlai dar 6 thleng vote thlak theih a ni ang.

Inthlan hi boruak muanawm tak hnuaia neih a nih theihna atan venhimna lam pawh uluk taka kalpui a ni a, Delhi Police-te chuan khawpui chhung hmun hrang hrangte uluk takin an vil reng a ni.

Vote thlak ni hian venhim hna thawka duty turin police 55,000 dah an ni dawn a, senior officer te'n thil awmdan an thlithlai reng bawk ang.

Delhi Assembly chhungah hian vote nei mi vaibelchhe 1.33 an awm a, mipa vote nei 73,89,089, hmeichhia 59,19,127 leh third gender 862 an awm. Vote nei zinga 2,27,316 chu kum 18-19 inkar an ni a, kum 20-29 inkar mi 36,93,975 awmin, kum 100 chuang mi 311 an awm bawk.

Matia Mahal constituency chu vote nei tamna ber bial a ni a, vote nei 3,47,245 an awm a, a tlemna ber bial Chandni Chowk-ah mi 1,13,777 an awm.

Assembly bial 70 ah hian candidate 673 an awm. Candidate zingah hian hmeichhia 63 an awm. Inthlan chuh tumte zingah hian mi 296 chu recognised national leh state party mi an ni a, 183 chu registered party mi niin, independent candidate 194 an awm bawk.

North Delhi-a Burari constituency chu candidate tamna ber bial a ni a, candidate 18 an awm. Ahmedkar Nagar chu an tlemna ber niin candidate pali an awm a ni.

Vote thlakna tur polling station 12,177 siam niin, heng zinga station 714 chu buai chhuah hlauhawmna leh venhim ngai zuala ngaih an ni.

Vote thlak zawh hnua EVM te dahṭhatna tur hmun 14-ah 'strong room' 70 siam a ni. Strong hi thuah thuma ven a ni dawn a, CAPF, state armed police force leh district police te'n an veng ang.

Chief Electoral Officer Chandra Bhushan Kumar chuan tluang taka vote thlak a nih theih nan election duty turin sorkar official 95,000 dah an ni a, polling booth tinte chu security force te'n uluk takin an veng reng bawk ang, a ti.

Polling booth chhungah hian vote thlak dan enfiah tur leh, EVM lama harsatna a awm leh awm loh endik turin micro observer 1,200 dah an ni dawn a, polling staton tinah CCTV camera dah a ni bawk ang. Polling station 142 chu police te'n live web-casting hmangin control room aṭangin an vil ang.

Inthlan campaign laiin party hrang hrangte an inbei na hle a, inthlan campaign vuakvetah hian Arms Act leh Excise hnuaiah FIR 254 ziah luh a ni a, mi 259 man an ni. Nimin thleng khan sum fai Rs 32,20,000 man a ni a, Model Code of Conduct palzuta inpuhna thubuai 252 thehluh a ni. Hei bakah hian political party te laka FIR thehluh 173 a awm bawk a ni.

Bhushan chuan inthlan dawnah party hrang hrangte'n election rally ṭum 21,702 an huaihawt tih a sawi bawk.