JD(U) te'n CM thlak tumin bei chhunzawm zel

Bihar-a rorellai, Janata Dal (United) MLA-te chuan Chief Minister Jitan Ram Manjhi chu thlak tuma nawr chhunzawm an tum.

JD(U) hruaitute chuan CM atan Nitish Kumar dah a nih leh theihna atan Manjhi hi bang turin an lo ngen tawh a, mahse Manjhi hian amah banna theh­luh a tum loh thu leh an duh chuan party lam chuan ban mai turin a ti let thung.

CM hian February 20-ah legislature party meeting a ko a, hetihlai vek hian JD(U) president Sharad Yadav chuan vawiin hian meeting a ko ve bawk. Manjhi chuan party President meeting koh hi dan kalh a ni, a ti.

Manjhi chuan, "Legislature Party meeting hi Legislature Party hotu (Chief Minister) chauhin a ko thei a ni," a ti.

Hetihlai hian JD(U) general secretary KC Tyagi chuan party president-in meeting a koh chu dan ang thlap a ni tiin a sawi thung.

Rorellai JD(U) MLA tam zawk chuan CM atan hian Nitish Kumar dah a, kumin kumtawp lama assembly inthlan an neih tur pawh Nitish Kumar-a kaihhruaina hnuaia neih an duh a ni. Mahse MLA ṭhenkhat chuan Manjhi hi inthlan hma chu CM chhunzawm tir an duh.

February 20 hian Bihar Assembly Budget Session neih a ni dawn a, hemi hma hian CM thlak a nih dawn leh dawn loh chung­changah thutlukna siam a ni ang.