J&K-a tuilian tuarte'n zángnadawmna an dawng dawn
Jammu and Kashmir-a tuilian vanga chhiatna nasa tak thleng tuartute zinga mi 1445 hnena zángnadawmna pekna tur chu National Disaster Management Authority (NDMA) chuan a tifel tawh a, tuilian tuarte hian an bank account-ah ṭanpuina sum hi an dawng ang.
NDMA-in zángnadawmna pek tur a tihfel te hi mi 1445 an ni a, sum hi direct-in an bank account-ah chhunluh a ni dawn tiin state sorkar chuan a sawi.
State Governor NN Vohra-a'n a hriattir angin, Jammu Division-a Deputy Commissioner-te chuan a hmaa zángnadawmna a lo pek tawhte bank account pawh enfiah sakin, January 31 thlenga sum tihkhawtlaisakte chu NDMA hnenah an thehlut ang.
A hmain NDMA hian mi 1095 hnena zángnadawmna pekna tur hi a lo tifel tawh a, heng mite hi Rajouri district aṭang mi 756, Jammu district-ah mi 89, Udhampur 213, Samba 20 leh Reasi district-a mi 17 te an ni.
Governor chuan Poonch district hnena State Disaster Response Fund (SDRF) pekna tur pawh tihfel a nih tawh thu a sawi bawk a, PMNRF hnuaia ṭanpuina sem tur chu tihkhawtlai a ni tur a ni lo, a ti.