Eptu party CM-ten NITI Aayog meeting boycott dawn

Sorkar laipuiin NITI Aayog meeting a koh chu epty party chief minister-ten boycott an tum. State pali chief minister-te chuan Union Budget 2024-25 pharh taka an lungawi lohna lantir nan an boycott dawn tih an puang tawh a, an zinga pathum hi Congress chief minister an ni. Eptu party CM dang pawhin boycott an tum nia sawi a ni bawk.

Tamil Nadu chief minister, DMK hruaitu MK Stalin chuan press conference-ah NITI Aayog meeting-a a tel dawn loh thu hi a lo puang tawh a, Congress general secretary KC Venugopal pawhin Union Budget-a inthliarhranna nasa tak lantir chu an duh loh avangin Congress chief minister pathumte chuan meeting hi an boycott dawn tih a puang ve bawk. Congress CM te hi Sukhvinder Singh Sukhu (Himachal Pradesh), Siddaramaiah (Karnataka) leh Revanth Reddy (Telangana) te an ni.

Anni bakah hian eptu party chief minister dang, Keralam CM Pinarayi Vijayan (Communist Party of India-Marxist), Jharkhand CM Hemant Soren (Jharkhand Mukti Morch) leh Punjab CM Bhagwant Mann (Aam Aadmi Party) te pawhin meeting hi boycott an tum nia sawi a ni bawk.

NITI Aayog meeting hi prime minister Narendra Modi kaihhruaiin Inrinni hian neih a ni ang.

Eptu party-te chuan union finance minister, Nirmala Sitharaman-i'n union budget a pharhah khan BJP leh a thawhpuite sorkarna ni lo, eptu party sorkarna state-te chu thliarhran an ni tiin, hei hi India ram inrelbawlna kalphung bawhchhiatna a ni, an ti. Eptu MP-te hian Parliament complex-ah budget thar laka an lungawi lohna pawh hi an lo lantir tawh bawk a ni.