US-in Manipur leh J&K-a zin lo turin an mite chah

US chuan America mite tan travel advisory ti chhuak tharin, Manipur leh Jammu and Kashmir bakah, Naxal hel chet hluarna India ram laili leh khawchhak lama zin lo turin a chah.

America mipui tana thuchhuah an siamah hian, US State Department chuan pawikhawihna leh firfiaka chetna a hluar chhoh zel avangin fimkhur turin a chah a, hmun ṭhenkhat phei chu a hlauhawm zual a ni, a ti. Jammu and Kahsmir, Ladakh region khawchhak lam leh a capital Leh huam tel loin, India-Pakistan border aṭanga km 10 huam chhung, Central leh East India hmun ṭhenkhat leh, Manipur state-te chu tharum thawhna, pawikhawihna leh firfiaka chetna a thlen fo avangin zin lo turin an mi leh sate an hrilh a ni.

Tun hnaiah hmarchhak state zingah Assam, Nagaland, Arunachal Pradesh, Mizoram, Sikkim, leh Tripura-ah tualchhung buaina liantham thleng awm lo mah se, US chuan hmarchhak biala zin tumte pawh ngaihtuah ṭha leh turin a chah a, chi bing pawlten tharum thawhna an thlen leh ṭhin nia sawiin, bus, rel leh rel kawng bakah bazar hmunte bomb a ni ṭhin, tiin a tarlang.

State Deparment hian India ram pum chu 'Level 2' (Exercise Increased Caution)-ah a dah. Hmarchhak pum chu Level 3-ah dah a nih laiin, Manipur leh Jammu and Kashmir leh Naxal chet hluarna hmunte chu Level 4-ah dah a ni.