Mamata-in NITI Aayog meeting-ah tel a tum

West Bengal chief minister, Trinamool Congress (TMC) hruaitu ni bawk Mamata Banerjee chuan vawiina Delhi-a NITI Aayog meeting-ah a tel dawn tih a sawi.

Union budget 2024-25 pharh takah eptu party sorkarna state thliarhran nia puhin, INDIA bloc hnuaia party CM-te chuan NITI Aaygo meeting hi boycott an tum thu an lo sawi tawh a ni. TMC hi INDIA bloc-a tel mah se an party hruaitu hian meeting-ah a tel dawn tih a sawi a, a tel chhan tur erawh budget pharh taka inthliarhranna nasa tak awm a duh lohna leh, Bengal bakah eptu party dang sorkarna state dangte ṭhendarh tuma phiarrukna a duh loh zia lantirna remchangah a hmang dawn tih a sawi thung.

CM Banerjee chuan, "Meeting-ah hian eng emaw chen chu ka awm ang. Thusawina hun remchang ka neih chuan, budget leh eptu party sorkarna state chunga an thil tih dan duh lohna ka lantir dawn a ni. Hetianga ka ti thei dawn lo a nih chuan meeting-na aṭangin ka chhuak nghal ang," a ti. Eptu party sorkarna thliarhran leh, BJP leh a thawhpui party sorkar duhsak uchuak bik an ni chu a pawm theih loh thu a sawi. Banerjee hi a vahpa, TMC MP leh party national general secretary, Abhishek Banerjee nen nimin khan Delhi hi an pan a ni.

Eptu party sorkarna state - Tamil Nadu, Kerala, Punjab, Karnataka, Himachal Pradesh leh Telengana chief minister-te chuan NITI Aayog meeting hi an tel dawn loh thu an lo sawi tawh a, an zingah hian Congress chief minister pathum an tel.