NITI Ayog meeting hmasa ber neih a ni

Prime Minister Narendra Modi kaihhruaiin nimin khan Niti Aayog governing council meeting hmasa ber neih a ni a, PM chuan Chief Minister-te leh Lieutenant Governor-te chu Budget 2015-16 chungchang a sawipui.

PM chuan project timuang thei thil hrang hrangte enfiah turin CM te a chah a, state hrang hrangte chu an inkar inhriatthiam lohna awmte dah bo a, ram ṭhanna tur te, hna tam zawk siamna tur leh investment chungchang tuaithar leh tura theihtawp chhuah turin a ngen.

Modi chuan retheihna umbo chu an hnathawh tura chona lian tak a ni tiin, tun hnaia din thar Niti Aayog chuan thawhhona leh inelna ṭha a siam dawn a ni, a ti.

National Institution for Transforming India (NITI Aayog) hi kum 60 zeta upa, Planning Commission thlakna atana din a ni a, Prime Minister chu chairperson a ni. Nimina meeting-ah hian Chief Minister eng emaw zat bakah, state leh UT aiawhte an tel.

PM chuan CM-te chu sorkar laipui thawhpui tur a, Team India anga thawkho turin a sawm a, state hrang hrangte'n hma an sawn loh chuan India chuan hma a sawn thei dawn lo a ni, a ti. "Ramin hma a sawn loh chuan hna thar siam theih a ni lo a, retheihna umbo theih a ni hek lo," tiin PM chuan a sawi.