Gujarat-ah swine flu vangin mi 5 an thih belh

Gujarat state-ah kar kalta Inrinni khan swine flu, H1N1 vangin mi panga an thih belh leh. Kumin January thla aṭang khan he hri vanga thi hi mi 71 an tling tawh tiin official thuchhuah chuan a tarlang.

Gujarat sorkar chuan swine flu vanga mi panga an thih bakah a vei thar mi 70 hmuhbelh an ni, a ti a, January 1 aṭanga swine flu vei hriatchian tawh hi 627 an ni, a ti.

Kutch district chu swine flu hluarna ber district a ni a, he district chhungah hian swine flu vei mi 199 an awm a, an zinga 25-te chuan an thihpui tawh a ni.

State Health Minister Nitin Patel chuan Ahmedabad-a Civil hospital tlawhin, doctor-te a kawm a, damdawi an enkawl dante a sawipui. Patel chuan kar hnih liamta aṭang khan swine flu vei thar hi a pung niin a sawi a, an ṭhenawm state Rajasthan leh Madhya Pradesh mite pawh Ahmedabad-ah hian swine flu vanga enkawl mek an awm tih a sawi.