Ni 5 chhung police-te'n Matang Singh an kawl dawn

Saradha Group-in investor-te sum tam tak a tihchingpensak kaihhnawihah Central Bureau of Investigation (CBI) te'n an man, Union Minister hlui Matang Singh chu ni nga chhung police-te kutah a la awm dawn.

Alipore Court ACJM(in-charge) Manikuntala Roy chuan CBI-in February 11 thleng Singh kawl a dilna chu a phalsak a ni. Judge hian defence counsel-in thu an zawhfiah laiin Singh hi ukil pe tur a ngensakna chu a remti bawk.

Singh hi CBI-te'n Kolkata-a an office-a thu zawhfiah tura an koh angin January 31 khan a inlan a, an lo man nghal a ni. Singh chuan a lung thlak a nih tawh avangin a taksa lamah harsatna a tawk fo tih sawiin, bail-a chhuah dilna a thehlut a, a dilna hi ngaihtuahsak a la ni lo.