Bihar rorellai party buaina a la reh lo

Bihar-a rorellai party, Janata Dal United MLA te'n Chief Minister thlak an duh vanga an buaina chu a la reh lo a, nimin khan JD(U) MLA-te hian Governor hmuin, Nitish Kumar kaihhruai sorkar thar siam an rawt.

JD(U) MLA tam zawk hian Chief Minister Jitan Ram Manjhi chu bang turin an nawr a, a aiah Nitish Kumar dah an duh a ni. Mahse Manjhi hian ama duhthua banna thehluh a tum loh thu leh, party chuan a duh leh ban mai zawk turin a ti thung. Delhi-a awm mek, Manjhi chuan Bihar state chhung politics buaina thleng mek chungchang hi Prime Minister Narendra Modi sawipui a tum thu a sawi.

Kar kalta Inrinni khan JD(U) MLA-te chuan meeting neiin, Manjhi hi legislature party hruaitu a nihna aṭangin an ban.

Nimin khan JD(U) hruaitute chuan Governor Kesrinath Tripathi an hmu a, CM hlui Nitish Kumar kaihhruaina hnuaiah sorkar thar an siam theih thu an hrilh. He hunah hian Congress leh RJD hruaitute bakah independent MLA-te pawh an tel.