Delhi inthlanah vote 67% a tla Exit poll-ah AAP in hma a hruai fal

Kar kalta Inrinnia Delhi Assembly inthlan neiha vote tla chu 67% a tling a, hei hi assembly inthlan an neih tawhah vote a tlak ṭhat ber ṭum a ni.

MLA 70 awmna, Delhi Assembly inthlanah hian candidate 673 an awm a, vote thlakna EVM-te chu strong room-ah dahin, February 10-ah vote hi chhiar an ni ang.

Kumin assembly inthlana vote tla hi kum 2013 inthlana vote tla aiin 1.28% in a sang zawk. Kum 2014, April thlaa Lok Sabha inthlanpui neihah khan Delhi-ah hian vote 65.07% a tla.

Election commission chuan inthlan hi boruak muanawm tak hnuaiah zawh a ni, a ti a, vote thlakna Electronic Voting Machine-ah pawh harsatna lian tham thleng a awm lo tih a sawi. Delhi Chief Electoral Officer chuan rin phak bakin vote a tla ṭha, a ti.

North East Delhi bial chu vote tlak ṭhatna ber niin, vote 69.96% a tla a, a tlak chhiatna ber New Delhi-ah vote 64.16% a tla a ni. Exit poll hrang hrangah Aam Aadmi Party (AAP) chu party mala sorkarna siam thei tura khawpa a chak rin a ni.