College-a beauty show khap turin hriattir

Madras High Court chuan Tamil Nadu-a college leh educational institution dangahte beauty contest neih ṭhin chu khap tura hriattirna tichhuak turin state sorkar a hrilh.

Court chuan ramp-a kal a, an va in show aṭang hian zirlaite'n an zirna kawnga an hlawk phahna engmah hriat a ni lo, a ti.

Kum 2013 khan Tamil Nadu-a engineering college pakhata zirlai, PS Akshaya chu beauty contest-ah pakhatna niin lawmmanah cheng nuai 25 pek tiam a ni. Mahse a lawmman lak a tum hian university chuan beauty contest buatsaih a nih chungchang hi engmah a hriatpui ve loh thu an lo sawi a, hei vang hian zirlai nu hian court-ah petition a thehlut ta a ni. A petition thehluh hi tun thla ni 20 hian ngaihtuah chhunzawm leh a ni ang.