Bihar CM Manjhi a bang duh lo JD(U) in party atangin a hnawtchhuak

Bihar Chief Minister Jitan Ram Manjhi chu rorellai, Janata Dal United MLA-te'n Chief Minister aṭanga bang turin nawr mah se a bang dawn lo tih a sawi a, House-ah fiah a cho thu a sawi. Nimin khan JD(U) chuan CM Manjhi hi an party aṭanga an hnawh­chhuah thu an tarlang.

CM atana Nitish Kumar dah duhtu, JD(U) MLA-te hian Manjhi hi bang tura nawrin, Legislature party hruaitu a nihna aṭang pawhin an ban tawh a ni. Mahse Manjhi chuan ban mai a tum loh thu leh, February 19-20 hian Assembly House-ah a thlawptu a neih leh neih loh a fiah dawn a, fiahna hi a paltlang thei lo a nih chuan CM a nihna aṭangin a bang chauh dawn tih a sawi.

Pathianni khan Manjhi hian Prime Minister Narendra Modi pawh a kawma, mahse hetah hian an state politics chungchang a sawipui lo niin a tarlang. Hetihlai hian BJP MLA-te chuan CM hi fiah a nih hunah an thlawp ngei rin a ni.

Nitish Kumar chu thuneihna chan chakah puhin, Manjhi chuan CM hlui Kumar chu mi ṭha tak ni mah se thuneihna a chelh loh chuan a awm thiam lo niin a sawi. "CM a nih theihna remchang a neih ang apiang chu a hmang duh a ni," a ti.

Kar kalta Inrinnia JD(U) hotu Sharad Yadav-a'n legislature party meeting ko a, hruaitu thar atana Nitish Kumar an thlan chu dan kalh a ni, tiin Manjhi chuan a sawi bawk. Mahse Bihar assembly speaker Uday Narayan Chaudhary chuan Pathianni khan Nitish Kumar hi JD(U) legislature party hruaitu thar atan a pawmsak tawh a ni.

Sharad Yadav chuan nimin khan Manjhi hi an party duhdan kalha a chet avangin party aṭangin a hnawtchhuak a, darkar 48 chhunga Nitish Kumar kaihhruai sorkar din turin JD(U) chuan a phut.

Manjhi hian banna a thehlut duh lo a nih chuan Governor Kesari Nath Tripathi tan tih tur kawng thum a awm a, assembly ṭhiata President's rule puang tura rawtna thlen; House-ah Manjhi hian thlawptu a ngah leh ngah fiah; Manjhi-a'n sorkar siam tura thlawptu MLA a ngah tawk loh chuan JD(U) party hotu thar Nitish Kumar chu sorkar siam tura sawm te a ni.

Nikum Lok Sabha inthlanpuia JD(U) an chet chhiat avanga Bihar CM a nihna aṭanga bang, Nitish Kumar hi an party MLA-te chuan CM atana dah leh a, kumin kumtawp lama assembly inthlan neih tur pawh a kaihhruaina hnuaiah hmachhawn an duh a ni. Nitish Kumar chuan CM atan hian JD (U) MLA 111 te bakah independent MLA-te'n an thlawp a, member 243 awmna Assembly-ah hian thlawptu 130 a nei tling tih a sawi. Nimin khan Party hruaitute chuan Kumar-a CM atana duhtu MLA list hi governor hnenah hian an thehlut a ni.