HSBC-a account nei zingah India mi 1,195 an tel

Switzerland-a private bank HSBC-a account neite hming a put ru a, an zingah hian India mi 1,195 an tel. Private bank-a account neite hming putru hi ram hrang hrang 203 a mite an ni.

Document putru-ah hian account neite hming 100,000 a lang a, an account chanchin kimchang leh, kum 2006-07 thlenga an balance neih zat thlengin a lang. Heng account neite sum tlingkhawm hi dollar tluklehdingawn 100 chuang a tling.

India mi, account nei hming langte zingah hian sumdawng lian leh politician-te an tel. Finance Minister Arun Jaitley chuan list-ah hian a hmaa rampawn lama account nei tih la hriat loh hming tharte pawh a lang tih a sawi a, an zingah hian dan loa account siam an awm em tih hrefiah turin sorkar chuanhma a la dawn tih a sawi bawk. India mi account neite sum dah tlingkhawm hi dollar tluklehdingawn 4.1 a tling.

Supreme Court-in ram pawn lama sum chheprelh chungchang chhui tura a ruat, special investigation team chuan account nei hming tihchhuah thar a nih leh avang hian nimin khan emergency meeting a nei nghal a, list thara chuangte hi a chhui chiang nghal ang.

Switzerland sorkar thupuangtu chuan list tihchhuah hi kum 2007-a an data ruksak an nih ṭum a mi a ni, a ti. Kum 2009 aṭang khan Switzeland chuan financial market policy thlakin, chhiah awlruk tum vanga an bank-a sum chheprelh tumte dan tumin theihtawp a chhuah a ni, a ti.