Delhi Chief Minister ni tura Arvind Kejriwal zinkawng

Kum 2014, February 14 khan Delhi Chief Minister Arvind Kejriwal chu Delhi assembly-ah eiruk dona bill (Jan Lokpal Bill) a putluh theih loh avangin Chief Minister aṭangin a bang a, assembly-ah sorkar siam thei an awm loh avangin sorkar ṭhiah a ni.

Kum khat a liam. February 7, 2015-ah Delhi mipuite'n an aiawh tur an thlang ṭha leh a, February 14, 2015-a Chief Minister thar lakluh a hun meuh chuan Chief Minister tur chu Arvind Kejriwal tho a ni.

Kum 2013, December 28-a Delhi Chief Minister atana lakluh a nih aṭangin ni 49 chauh a hna a chelh hman. India mipuite mak tih khawpa Delhi Chief Minister dinhmuna inhlangkai thei Kejriwal hian Chief Minister a nih hnuah Delhi Chief Minister ni rei lo ber record a siam nghe nghe.

Hun kal ta kha...

Arvind Kejriwal hi kum 1968, August 16-ah Haryana, Bhiwani district, Siwani khuaa chhungkaw naran takah a piang a, Gobind Ram Kejriwal leh Gita Devi fa pathum zinga upa ber a ni.

Indian Institute of Technology (IIT) Kha­ragpur aṭangin Mechanical Engi­neering-a a graduate hnuah kum 1989 khan Jamshedpur-a Tata Steel company a zawm. Civil Services Exam atana inbuatsaih nan kum 1992 khan a hna a bansan a, kum 1995-ah Indian Revenue Service (IRS)-ah a inziak tling.

Kum 2006 khan New Delhi-a Joint Commissioner of Income Tax a nihna aṭangin a bang leh a, RTI activist niin eiruk dona kawngah theihtawp chhuahin a inhmang zui.

Parivartan leh Kabir

IRS officer a nih laiin Income Tax department-a eirukna nasa tak chuan Kejriwal a timangang a, kum 1999, December khan Manish Sisodia nen khawtlang mipuite harsatna bawhzui nan Parivartan (change) an din a, Public Distribution System (PDS), public works, social welfare schemes, income tax leh electricity lama mipuite harsatna an bawhzuisak ṭhin. January 2000 khan thudelhkilh awmin a hna aṭangin chawlh a la a, Parivartan tan theihtawp chhuahin a bei chhunzawm. November 2002-ah a hna a zawm leh a ni.

Ramon Magsaysay

Award goes to... Kejriwal

Kum 2005-a India ram puma Right to Information Act hman a nih theih nana Anna Hazare, Aruna Roy leh Shekhar Singh te'n nasa taka an beihnaah Kejriwal hnathawh pawhin hriat a hlawh thuai a, India ram puma RTI hman a nih theihna tura tha thawhtu pawimawh tak pakhat a ni.

Kum 2006-a Joint Commissioner of Income Tax aṭanga a ban meuh chuan khawtlang tana a hnathawh ṭhat avangin 'Ramon Magsaysay Award for Emergent Leadership' dawng tura thlan a ni.

Public Cause Research Foundation

December 2006 khan Kejri­wal chuan Manish Sisodia leh Abhinandan Sekhri nen Public Cause Research Foundation an din leh a, Ramon Magsaysay Award a dawna sum fai a dawnte chu Foundation tan hian a hlan vek. He foundation hian Parivartan kaltlanga khawtlang tana inpete chu lawmman a siamsak ṭhin.

AAP a piang...

Kum 2012, November 26-ah Jan Lokpal activist dangte nen Aam Aadmi Party (comman man party) dinin, party politics a luhchilh a, party National Convener atana thlan nghal a ni.

2013 Delhi inthlan...

Delhi CM tharah Kejriwal

Kum 2013-ah Delhi assembly inthlan neih a ni a, Kejriwal-a party-a AAP chuan party mala inthlan chuhin seat 70 awmah seat 28 an la a, BJP-in seat 30 lain party mala seat la hnem ber a ni a, rorellai Congress-in seat 8 a la. Kejriwal hian Delhi Chief Minister ni lai Congress party mi, Sheila Dikshit chu vote 25,864-in a hneh.

Inthlan result puan hnuah party mala sorkar siam thei an awm loh vangin Kejriwal chuan pawn lam aṭanga Congress MLA pariat, Janata Dal leh independent MLA pakhat ve ve thlawpna-in sorkar a siam a, Delhi Chief Minister atan December 28, 2013 khan lakluh a ni.

Ni 49 hnuah Chief Minister a bang

Kejriwal hian ni 49 chauh Chief Minister office a luah hnuah nikum February 14 khan a thil tum, Jan Lokpal Bill chu Delhi assembly-a a putluh theih loh avangin a bang. BJP leh Congress chu eiruk dona bill dangtuah puhin assembly ṭhiah a rawt a, party dang sorkar siam thei an awm loh avangin nikum February 17 aṭangin Delhi chu president's rule-a dah a ni a, November 5 khan assembly ṭhiah a ni.

APP-in hnehna an chang

Arvind Kejriwal hian nikum January khan May thlaa Lok Sabha inthlanpui neih turah inthlan chuh a tum loh thu a sawi a; nimahsela party mi ngenna vangin a rilru a thlak a, Varanasi bialah Narendra Modi a khing a, mahse a chak zo lo.

Kumin Delhi assembly inthlanah New Delhi bialah dingin BJP candidate Nupur Sharma chu vote 31583-in a hneh. February 14 hian Delhi Chief Minister atan lakluh a ni ang.