Assembly seat 70-a seat 67 la thei AAP

Feb 14-ah Delhi CM atan Kejriwal-a lakluh a ni dawn

February 7-a Delhi assembly inthlan result chu nimin khan puan a ni a, Aam Aadmi Party (AAP) chu rin phak baka che ṭhain seat 67 a la thei a, rorel thei tura inngai BJP chuan seat 3 chauh lain, kum 15 chhung zet Delhi-a ro lo rel tawh, Congress party chu a artelukawn.
Rohini, Mustafabad leh Vishwas Nagar bialah BJP an chak a, a dang zawng chu AAP hian an hui vek a ni. BJP-in chief minister candidate atana a dah, Kiran Bedi chu an party-in bial him bera a ngaih, Krishna Nagar bialah a chak zo lo. Bedi hian a khingpui, AAP candidate SK Bagga chu vote 2,400 in a hneh lo a ni.
AAP hotu, Arvind Kejriwal chu February 14 hian Ramlila Maidan-ah Delhi Chief Minister atan lakluh a ni ang. Delhi CM thar tur, Kejriwal hian an chakna chan mipuite chakna a ni a ti a, a ngaih pawimawh ber tur chu eirukna umbo a ni tih a sawi.
Kejriwal chuan, 'Lo thlaphan lawkna pawh ka nei lo a, mipuiten min thlawp ṭha em emtih ka hria a ni. Chief Minister ṭha tak, eirukna tibotu leh VIP culture titawptu nih ka tiam a ni' a ti. Kum 46 mi, activistaṭanga politician-a inlet ta hian 'Mi naran mai ka ni' a ti.
Delhi mipuite hnenah lawm­thu sawiin, Kejriwal-a chuan tunah chuan kawng dik lam an thlang ta tih a sawi.
AAP hruaitu, Manish Sisodia pawhin an party-in hnehna an channa chhan chu Delhi mipuiten sorkar dik, sorkar rinawm an duh tawh vang a ni, a ti. Hnehna an chan avangin midangte chhaih leh nuihzat an tum lo tih Sisodia chuan a sawi a, mipuite chuan politics kalphung hluite an ning a, politics thianghlim leh hmasawn duh chu an thlang tawh a ni, a ti.
Prime Minister Narendra Modi chuan telephone-in AAP hotu Kejriwal-a biain, an party-in hnehna an chan avanga a lawmpui thu a hrilh. PM chuan Delhi-a AAP sorkar chuan sorkar laipui chuan theihtawpa a thawhpui zel tur thu a sawi a, Kejriwal-a hi thingpui in pui turin a sawm nghal.
BJP CM candidate Kiran Bedi chuan an party chak loh chhanah mawhphurhna a lak tur thu a sawi a, Kejriwal-a nen an inbeihnaah pakhat zawk chauhin hnehna a chang thei a ni, a ti. Bedi chuan Delhi inthlan result chu central-a Prime Minister Narendra Modi kaihhruai sorkar dinhmun ennawnna anga sawi chu a pawm lo tih a sawi a, Kejriwal-a chu a lawmpui thu a sawi bawk.
BJP chuan an chak loh an pawm thu sawiin, chief minister candidate atana Kiran Bedi an dah chu an tisuala an ngaih loh thu an sawi.
Congress president Sonia Gandhi leh vice president Rahul Gandhi-te chuan AAP leh Arvind Kejriwal chu lawmpuina an hlan. Rahul-a office chuan thuchhuah siamin, Delhi mipui­te chuan an aiawh turin AAP an thlang a, inthlan result hi an pawm thlap tih a sawi.
Delhi inthlan neih tura Congress party campaign hotu atana dah, Ajay Maken pawhin Kejriwal-a lawmpuina hlanin, All India Congress Committee general secretary a nihna aṭangin banna a thehlut nghal. Maken chuan Kejriwal chuan ṭha taka ro rel a, inthlan dawna a thutiamte a tihpuitlin ngei a beisei thu a sawi.
Politics a luhchilh hmaa Team Anna hnuaia Kejriwal-an a hnung a lo zui ṭhin, social activist Anna Hazare pawhin Kejriwal-a hi a lawmpui thu sawiin, 'Mite chuan Narendra Modi thli a tleh niin an sawi ṭhin a, mahse hei hi a dik lo a ni. Modi hian mipui hnena thil tam tak tiamin a tihlawhtling leh si lo a, eirukna a tireh ang tih a tiam a, chu chu a takin a thleng si lo a ni' a ti. Hei vang hian mipuiten Modi an rinna chu a tlahniam ṭan a, eirukna umbo a nih theihna atan hian Arvind Kejriwal-a hian a bei theih an ring a ni, a ti.
Hazare chuan Kejriwal-a chu CM a nih hmasak ṭuma a tihsual ang kha tisual nawn tawh lo turin a chah. Kejriwal chu CM a nih leh hunah pawh a khawsak tisang lo a, simple taka awm chhunzawm zel a pawimawh tih sawiin, chu­tianga a awm chuan mipuiten amahah rinna an nei nghet thei dawn a ni, a ti.

AAP chetthat chhana ngaihte
Assembly inthlan neih tur atan hian AAP leh an hotu Kejriwal-te hi hun rei tak an inbuatsaih a ni. Kum 2014 Lok Sabha inthlanpuia an chet ṭhat loh avang khan AAP hian Delhi Assembly inthlan tur hi an thlir nghal a, hemi atan hian an inpuahchah nghal a ni. BJP leh Congress-te aiin an party manifesto leh candidate-te an puang hma a, AAP hruaitute hi mipui nawlpui­te nen an inbepawp ṭha zawk a ni.
Kejriwal-an ni 49 chauh sorkar a siam hnua a ban chungchangah Delhi mipuite hnenah tih tak zetin ngaihdam a dil reng a, hei hian mipuite rilru a hneh niin a lang. A khingpuite hminghmerha a sawichhiat ṭhin pawh a sim a, inthlan dawnah na takin Kiran Bedi nen inbei mah se, a chanchin chhe lam zawngin a sawilang lo. Hetianga a inthlak danglam tuma a beihna hian mipuiteah a ṭha lam hawiin nghawng a nei a ni.
Mi narante tana ding an nih thu an sawi angin, muffler awrh a, thawmhnaw naran tak a inbel chu a thil tum lanchhuah tirna ṭha taka ngaih a ni. Kumin Republic Day-a Prime Minister Narendra Modi-an a hming chuanna suit, cheng nuai 10 man nia sawi a inbel chuan inthlan campaign-naah PM Modi leh BJP beihna remchang tak a siam phah a ni.
AAP hian Muslim voter tam zawk a hip a, inthlan hmasaah khan Muslim vote hi AAP leh Congress-te'n an insem a ni. Mahse kumin inthlanah chuan Congress party vote tu tam zawk chu AAP lamah hian an pakai a ni.
Congress party chet chhiatna chu AAP hian a hlawkna a tel a, Congress vote tam tak a huilut.
BJP inrintawk lutukin ṭan an lak tlai chu AAP hian a hlawkpui nia ngaih a ni bawk. BJP hi PM Narendra Modi leh party president Amit Shah-te chungah an innghat nasa a, party anga ṭan lak an tum meuh chuan AAP hian nasa takin hma a lo hruai khalh tawh a ni. Hei bakah hian AAP leh Arvind Kejriwal-a beih nana hun an hmang nasa lutuk chu an chhiatpui zawk nia ngaih a ni.
BJP-in an party-a lut thar, Kiran Bedi-i party chief minister candidate atana a duh chu an thil tihfuh loh nia ngaih a ni. Party worker tam takin an pawm thei lo a, party chhungah ngei pawh Bedi hian dodalna a tawk.
AAP hian sakhaw bil ang zawngin vote a zawng lo a, Jama Masjif hruaitu Shahi Imam Bukhari-an thlawp a tumna pawh a hnawl ngam. Hei hian mipui nawlpui rilruah nghawng ṭha tak a siam nia ngaih a ni.