Hri kai hmuh chhuah thar aiin Dama puan an tam zawk

Covid-19 hripui lengin India ram a run mek zel a, nimin thleng khan ramchhung hmun hrang hrangah hri kai hmuh chhuah mi 31,67,323 an awm tawh.

India ramah hian hri kai an pung chak hle a, nimina Ministry of Health and Family Welfare-in report a tihchhuahah chuan hri kai hmuh chhuah thar mi 60,975 lai an awm leh. Hetihlai hian darkar 24 chhungin dama puan mi 66,550 an awm tawh bawk a, hri kai hmuh chhuah thar aiin dama puan hi an tam zawk a ni.

Hri len ṭantirh aṭanga nimin thleng khan hri kai dam leh tawh 24,04,585 an awm a, mi 848-in an thihpui leh avangin hri vanga thi hi mi 58,390 lai an awm tawh a, 7,04,348 chuan hri an la kai mek thung.

Enkawl dam tawh rate hi a sang tawh hle a, 75.91% tling chho tawhin 76% a hnaih tawh hle. Thihpui rate pawh 1.84%-ah a tlahniam ve tawh bawk. Hri kai mek aiin enkawl dam tawh hi a let 3.14-in an tam zawk.

Indian Council of Medical Research (ICMR) chuan nimin khan Covid-19 sample 9,25,383 an endik leh tih sawiin nimin thlenga an sample endik tawh zawng zawng hi 3,68,27,520 a ni. ICMR pawmpui Covid-19 sample endikna laboratory 1524 a awm tawh a, sorkar laboratory 986 leh private laboratory 538-ah sample endik hna hi an thawk.

India hi Covid-19 kai tam ram pathumna la ni reng mah se August 4 aṭanga nimin thleng khan ni khata hri kai hmuh chhuah tam berna ram a la ni chhunzawm zel tih World Health Organization data aṭangin a lang. India aia hri kai tamna ram pahnih, US leh Brazil-ah chuan hri kai hmuh thar punna hi a tlahniam ṭan tawh a ni.