NEET leh JEE exam hun sawn hla turin Mamata-in sorkar laipui a ngen
West Bengal chief minister Mamata Banerjee chuan ram chhunga Covid-19 lengin ziaawm lam a pan loh avangin NEET (UG) leh JEE (Main) exam hun chu sawn hla turin sorkar laipui a ngen.
Ruahman lawk dan chuan NEET (UG) exam hi September 13-a neih tur a ni a, JEE (Main) exam hi September 1-6 ah neih tum a ni bawk. Mamata hian prime minister Narendra Modi hoa video conference kaltlanga meeting an neihah kumin September thla tawp lama University/College exam tura UGC-in guideline a tihchhuah chu ṭha lo a tih thu leh exam hun hi sawn turin PM hi a lo ngen tawh bawk a ni.
NEET (UG) leh JEE (Main) exam tur sawn hla tura a ngennaah Mamata chuan mipuite himna chu ngaihtuah tur a ni, a ti. Pathianni khan Congress president hlui Rahul Gandhi chuan sorkar laipui chu zirlai ten exam sawn hla rih tura an ngennate chu ngaihpawihmawh sak turin a lo ngen tawh bawk.
Kar kal ta Inrinni khan Delhi deputy chief minister Manish Sisodiab chuan NEET leh JEE exam chu ṭhulh turin sorkar laipui a lo ngen tawh bawk a, zirlaiten admission an hmuh theih dah tur kawng dap mai turin a ti a ni.
NEET leh JEE exam sawn hla tura rawtna hi tam tak awm mah se kar liam ta Zirtawpni khan National Testing Agency (NTA) chuan Covid-19 hri leng vanga exam-na centre thlak duh an awm chuan August 28 thleng thlak theihna hun hawn a nih thu a tarlang a, exam hi fimkhur taka neih pui a tum tlang niin a lang.