Oxford Covid-19 vaccine phase 2 enchhinna nei ṭan

Pune-a Serum Institute of India (SII) chuan nimin aṭang khan Oxford Covid-19 vaccine chu mihringa en­chhinna, phase 2 human cli­nical trial chu a nei ṭan ta. 

University of Oxford siam Covid-19 vaccine hi India rama enchhin turin SII hian British-Swedish pharma company, AstraZeneca a thawhpui a ni. Central Drugs Standard Con­trol Organisation (CDSCO)-in phalna a pek hnuah Pune-a Bharati Vidya­peeth Medical College and Hospital-ah nimin aṭang khan mihringa enchhinna chu neih pui ṭan a ni ta a ni. Mihring puitling, hriselna ṭha pangngaiah he enchhinna hi an nei dawn a ni. 

Drugs Controller General of India chuan August 3 khan Serum Institute of India hnenah hian clinical trial-a phase 2 leh 3 neih phalna a pe a, anni bakah hian India ram khawpui 17-ah enchhinna neih tura ruahmanna kalpui a ni bawk. Heng enchhinna hmun tur ṭhenkhatte hi AIIMS (Delhi), BJ Medical College (Pune), Patna-a Rajendra Memorial Research Institute of Medical Sciences (RMRIMS), Post Graduate Institute of Medical Education and Research (Chandigarh), AIIMS (Jodhpur), Nehru Hospital (Gorakhpur), Andhra Medical College (Visakhapatnam) leh JSS Academy of Higher Education and Research (Mysore)-te an ni.