India ram inthlan neih tawha Hnehna chang nasa ber AAP

Delhi Assembly in­thlan neih zawh takah Aam Aadmi Party (AAP) chuan assembly seat 70 awm aṭangin seat 67 a la thei a, hei hi India rama state inthlan neih tawha hnehna nasa ber a ni.

Seat 70 awmnah BJP-in seat thum chauh a la a, a bak chu AAP hian a hui vek a, a seat lak zat hi 96% a tling.

AAP dawta inthlana hnehna chang nasa chu kum 1990-a Odisha inthlana Biju Janata Dal (BJD) chak ṭum kha a ni a, seat awm zat aṭangin 84% an la. National Conference leh Congress party-te pawhin assembly inthlanah hian seat awm zat aṭanga 90% chuang lak ṭum an nei tawh bawk.

Delhi inthlana AAP candidate thlan tlin mi 67 zinga 45-te chuan an khingpuite chu vote 20,000 chuang vekin an hneh a, khingpui­te hneh nasa ber chu AAP candidate Mahindra Yadav niin amah hnaih bertu hian vote 77,665 in a pha lo. AAP hotu Kejriwal chuan a khingpui, BJP candidate Nupur Sharma chu vote 31,583 in a hneh.

AAP hotu, Arvind Kejriwal-a hi February 14 hian Chief Minister atan Ramlila ground-ah rinawmna thu tiamtira lakluh a ni ang. CM lakluh inkhawma tel tur hian Prime Minister Narendra Modi, union cabinet member, Delhi-a BJP MP leh BJP-in Delhi chief minister candidate tura a ruat, Kiran Bedi-te pawh an sawm vek dawn niin party hruaitu Manish Sisodia chuan a sawi. CM atana lakluh a nih hun tur hi kum khat liamtaa ni 49 chhung chauh Delhi CM a nih hnua banna a thehluh champha a ni. Kejriwal chuan vawiin hian PM Modi chu hmuin, lakluh inkhawma tel turin amah ngeiin sawm nghal a tum.

Delhi Police-te chuan AAP hotu Arvind Kejriwal-a hi legislative party hotu atana thlan a nih veleh Z caterogy security an pe nghal dawn tih an sawi. Police hotu chuan 'Z' category security-ah hian Delhi Police armed commando-te pawh an tel dawn a, mi 30 velin an veng dawn a ni," a ti. Ghaziabad-a cheng mek, Kejriwal-a hi venghimtu police 12 a nei mek a, UP Police-te'n escort vehicle an pe bawk.