NITI Aayog meeting-na aṭangin Mamata Banerjee a chhuak; Microphone off sak nia sawi Sitharaman-in a chhang

West Bengal chief minister Mamata Banerjee chu Inrinni liam taa prime minister Narendra Modi kaihhruaia National Institution for Transforming India (NITI Aayog) meeting neihna aṭangin lungawi loin a chhuak.

Mamta Banerjee chuan meeting-naah an state fund tur chungchang a sawi laiin a microphone an off sak niin a sawi. 'Ka ṭawng lai ngeiin ka microphone chu tihtawp a ni. Eng vangin nge in tihtawp a, eng vangin nge thliarhran bik in neih tiin ka sawi zui a ni," a ti. Meeting-ah hian eptu lam CM aṭangin amah chauh a tel a, heti chunga thu a sawi phalsak a ni lo chu Bengal chauh ni lo, regional party zawng zawng hmusitna a ni, tiin a sawi.

Hetih lai hian union finance minister, Nirmala Sitharaman chuan Bengal CM Banerjee chu thu dik lo thehdarhah a puh ve thung. Finance Minister hian a X-ah hemi chungchang hi post-in, Bengal CM chu a duh ang sawi turin hun pek a ni a, an hmaa tablet-ah pawh a sawi hun chu a lang vek tih a sawi. CM dang pawhin hun pek vek an ni a, an ngen a nih chuan hnialna awm loin hun pek belh an ni bawk a ni tiin, "Microphone off sak an ni lo a, West Bengal CM pawh off sak a ni lo, " a ti. Heti chung hian thu dik lo thehdarh chu a thlang zawk a ni tiin a sawi zui.

BJP hruaitu dangte pawhin Mamata Banerjee an dem thu hi sawiin, demna thu sawitu zingah hian union minister Sukanta Majumdar leh Hardeep Singh Puri bakah Assam chief minister Himanta Biswa Sarma-te pawh an tel. Eptu lam chuan West Bengal CM thlavang an hauh thung a, Congress leader Jairam Ramesh chuan meeting-a Banerjee an lo tihdan chu a lungawi thlak loh hle tih a sawi a,NITI Aayog meeting chu ngaihdan leh thlir dan hrang hrangte inhawng taka sawina tur a ni, a ti.

Prime Minister Modi kaihhruai NITI Aayog governing council meeting-ah hian kum 2047-ah India ram developed nation-a siam dan chungchang an sawi ho a ni. PM chuan he an tum ti hlawhtling tur hian state tinte chuan chanvo pawimawh tak an neih thu a sawi. Meeting-ah hian chief secretary-te puala National Conference vawi thumna buatsaih leh tura rawtna chungchang pawh ngaihtuah a ni bawk.

NITI Aayog governing council-ah hian PM chu chairperson niin, state zawng zawng chief minister, Union Territory-a lieutenant governor-te bakah union minister eng emaw an tel a ni.