Delhi-a coaching centre basement tuiin a chim vangin zirlai 3 thi

Delhi-a Old Rajinder Nagar-a coaching centre pakhat basement chu tuiin a chim, zirlai pathum an thi a, an zinga pahnih chu hmeichhia an ni.

Delhi police-te chuan nimin zing khan Rau's IAS centre coordinator leh building neitute hi an man tih sawiin, FIR pawh ziah luh nghal a ni tih an sawi. He thil thlen hun hi kar liam ta Inrinni kha niin, ruah sur nasa tak avanga coaching centre awmna bula tui paihna aṭanga tui luang liam chu centre basement, library atana an hmanah a luangliam a, rei lo te chhungin room chhungah hian tui hi feet 10-12 vel a tling hman a ni. Tuiin room a chim laia zirlai pathum awm, Shreya Yadav (UP), Nivin Dalwin (Kerala) leh Tanya Soni ( Telangana) te chu tlanchhuak thei loin tui hian chim hnain an thi ta a ni. Nimin zing khan zirlai pathumte ruang hi NDRF, police leh fire department-te thawk ho chuan an la chhuak a ni.

Delhi mayor Shelly Oberoi chuan thupek ti chhuak nghalin, Delhi khawpui chhunga coaching centre zawng zawng, basement hmang telte lakah action lak a ni dawn tih a sawi. Hetianga basement hman tel hi dan kalh a ni, a ti.

Delhi Fire Department chuan chhiatna thlenna, Rau's IAS centre basement pawh hi thil dahṭhatna hmun, storage atana hman tur chauhin no-objection certificate (NOC) pek an ni, a ti. Mahse centre hian storage atan hmang loin, dan kalhin library atan basement hi a hmang a ni.