Kejriwal-a'n Z Plus security a pawm dawn lo: AAP

13th February, 2015

Delhi Chief Minister tur, AAP hotu Arvind Kejriwal-a chu Delhi Police-te'n Z Plus security an pek tur thu an sawi tawh a, mahse Aam Aadmi Party (AAP) chuan venhimna pek an tum hi Kejriwal-a hian a pawm dawn lo, a ti.

AAP hruaitu Ashutosh chuan, "Arvind Kejriwal hian Z plus security hi a pawm dawn lo a, a chhan chu mipuite nena an indawrna kawngah harsatna a siamsak dawn vang a ni. Tunah hian security dil kan la nei lo. Police-te'n Z plus security an pek dawn chuan pek a ngaihna chhan chiang taka an sawi a ngai ang," a ti.

Hemi rual hian inthlan result puan zawh aṭang khan police-te chuan Kejriwal-a hi venghimtu an pek belh thu AAP hruaitu chuan a sawi.

Ashustosh chuan, "Chief Minister a nih hnu aṭang khan Delhi Police-te chuan Kejriwal hi an veng a, hei hi an chhunzawm reng a ni. A in pawn lama a chhuahin police motor-in an zui ṭhin a, inthlan zawh aṭang khan venghimtu pawh hi dahbelh a ni a, mahse Z plus security chu pek a la ni lo," a ti. CM a nih lai pawh khan Kejriwal hian venhimna pek hi a duh lo a, mahse police-te chuan an veng tho a ni.

Uttar Pradesh Police pawhin inthlan result puan hnu aṭang khan Kasuhambi-a Kejriwal-a inah venghimtu an dah belh a, commando 12-te'n silai nen an veng a ni.

Delhi Deputy CM atan Sisodia

Delhi-a AAP kaihhruai sorkar thar din turah an party hruaitu hlun, Manish Sisodia chu deputy chief minister-ah dah rin a ni. Sisodia hi nikum Lok Sabha inthlanpuia AAP an chetchhiat hnua an party indinthar lehna tura a lungphum pawimawh tak nia sawi a ni a, AAP sorkar hmasaah khan Education, PWD, Urban Development and Local Bodies minister a ni. Hetihlai hian an sorkar hmasak ṭuma minister ni lo tawh zingah Somnath Bharti, Rakhi Birla, Saurabh Bhardwaj leh Girish Soni-te chuan minister chanpual an chang pha tawh dawn lo nia sawi a ni bawk.

Nimin khan Arvind Kejriwal leh Manish Sisodia chuan Prime Minister Narendra Modi an hmu a, state puitlinga Delhi hlankai an duh thute pawh an sawilang nghal. Meeting hian minute 20 vel a awh a, PM chuan Delhi sorkar chu theihtawpa thawhpui zel a tiam. Nilaini khan Kejriwal hian Union Minister pahnih, M Venkaiah Naidu leh Rajnath Singh chu a hran ve vein a lo hmu tawh bawk a, Delhi tana state puitling pek chungchang hi a lo sawipui tawh bawk.