Gujarat-ah Modi-a temple siam a ni

Gujarat-ah Prime Minister Narendra Modi-a temple siam a ni a, Pathianni hian hawn a ni ang. Temple-ah hian Modi-a lim dah a ni.

PM Modi chuan media report aṭangin a hming­a temple siam hi a hriat thu leh, ṭha a tih loh thu a sawi. "Ka hminga temple sak a nih thu hi news report aṭangin ka lo hria a, min ṭhawng hle a ni. Hetiang hi India kalphung a ni lo," tiin hetiang an lo siam hian a tihrehawm hle a, tichhunzawm tawh lo se a duh thu a sawi.

Modi temple sakna hi Gujarat-a Kotharia khuaah a ni a, amah zui­tute'n an pawisa thawh­khawm hmanga an sak niin a sak nan hian kum hnih an hmang.

A tirah chuan temple-ah hian Modi-a thlalak lian vak lo dah a ni ṭhin a, mahse Lok Sabha inthlanpuia hneh taka BJP a chakpui hnu khan amah zuitute hian a lim lian tak siamin an thlak a ni. Kotharia leh a bul vela thingtlang khaw mi ṭhenkhat chuan Modi hi pathian angah ngaiin an bia a ni.

Modi chuan temple satute hnenah chuan an tha leh sumte chu India rama faina beihpui thlakna, Clean India campaign kalpui mek tihhlawhltlinna atana hmang zawk turin a ngen.

PM-in a hminga temple sak a nih chungchanga a lawmloh thu a sawi­chhuah hnu hian temple sakna project-a an hotu, councillor hlui Ramesh Undhad chuan temple hawn tur hi ṭhulh a nih tur thu a sawi. Undhad chuan, "Kan thiltih avanga kan pathian (Modi) rilru kan tihna hi hrehawm kan ti a, a lawmloh thu a sawi hnuah temple-a a lim pawh kan khuh tawh a ni," a ti. PM-in a ngen angin Clean India movement atan theih­tawp an chhuah dawn tih a sawi bawk.