Nitish-a'n MLA 130 hruaiin President a hmu

Bihar-a rorellai, Janata Dal United-in party legislature hruaitu atana an thlan thar, Nitish Kumar chuan amah thlawptu MLA 130-te nen President Pranab Mukerjee an hmu a, sorkar thar siam tura thlawptu a ngah tawk thu a hrilh.

Kumar hi JD(U) President Sharad Yadav, RJD hruaitu Lalu Prasad leh SP hotu Mulayam Singh Yadav-te'n an ṭawiawm.

Bihar-a JD(U) hian Chief Minister Jitan Ram Manjhi thlak a, a aiah Nitish Kumar dah an duh a, CM pawh hi bang turin an ngen tawh bawk. Mahse Manjhi hian banna thehluh a tum loh thu leh, House-ah fiahna paltlang a tum tih a sawi. BJP MLA-te chuan Manjhi hi thlawp an tum thu sawiin, hei vang hian fiahna pawh hi a patlang ngei dawn niin amah thlawptu lam chuan an sawi. State Governor chuan Chief Minister hi January 20-ah House-a fiah turin a ti.

Hetihlai hian Patna High Court chuan CM thlak a nih theihna atana JD(U) Legislature Party hotu atana Nitish Kumar thlan a nihna chu a pawmsak lo.

Nitish Kumar chuan CM Manjhi-a'n thlawptu a ngah tawk leh tawk loh fiah tura hun pek a nih chungchangah BJP chu inrawlhah a puh. February 20 thleng hun pek a nih avangin hemi karah hian MLA ṭhenkhat chu thlem thluk tumin an bei dawn a ni tiin, Governor thiltih dan chu PM Modi-a ruahmanna vek niin a sawi.

"BJP hian Manjhi hi amah thlawp tur MLA dang 35 thlem thluk tur zawng turin an ti a, hemi kawngah hian puih an tum bawk a ni," tiin Kumar chuan a sawi.