Delhi-ah Governor conference neih a ni

Nimin khan ni hnih awh tur 46th Governors' Conference chu Rashtrapati Bhavan-ah ṭan a ni a, President Pranab Mukherjee leh Prime Minister Narendra Modi-a'n an hmanpui.

Conference-ah hian Governor leh Lt Governor 21 an tel a, agenda zingah hian state chhunga himna chungchangte bakah international border nei state-a ramri himna chungchang ngaihpawimawh te, skill development program siamte, kum 2019-a Swachh Bharat thil tum tihhlawhtling tura hma lak te, ram danpui hnuai­a Fifth leh Sixth Sche­dule kaihhnawih thilte leh hmarchhak biala hmasawnna kalpui dan turte a tel.

President Pranab Mukherjee chuan thu sawiin, governor-te chu an awmna state ṭheuhah boruak muanawm a awmna tura theihtawp chhuah tur te leh, ram danpui kalh zawnga chetna laka fimkhur turtein a chah.

India chuan ramdangte nena inlaichinna ṭah tak neih a tum a, ramri buaina awm ṭhinte pawh boruak muan­awm tak hnuaia chinfel zel a tum tih President chuan a sawi. Hei bakah hian kum 2025-ah India ram chu khaw­vela hnathawk tamna bera siam tumin ruahmanna kalpui a ni tih a sawi bawk.