Ex-BSEB chairman a inpuang

Bihar School Examination Board (BSEB) chairman hlui Lalkeshwar Prasad Singh chuan pawl 10 leh pawl 12 zirlaite topper an nih theih nan khan cheng nuai 20 a la tih Nilaini khan police hmaah a puang.

Tunhnaia pawl 10 leh 12 resut tih chhuah takah khan topper pahnih te chu TV-ah kawm an ni a, zawhna an chhan theih loh ṭhin bakah, zirlai pakhat chuan political science subject chu eisiam lam zirna a ni a ti. Hei hian mi mak tih a hlawh hle a, India ram titipui ber a ni nghal. State sorkar chuan chhui chian a nih tur thu sawiin, a hnu lawkah BSEB chairman Lalkeshwar Prasad Sing chu bultumtu a nih thu puan a ni. Lalkeshwar Prasad Singh hian zirlaite hnenah affiliation tih nan cheng nuai li a la ṭhin. Singh bakah hian inhnamhnawihna neia rinhlelh ex-MLA pakhat leh professor hlui nupui Usha Sinha te chu Nilaini khan police custody-ah dah an ni.

Patna SSP Manu Maharaaj chuan, "Lalkeshwar Prasad Singh hian BSEB chairman a nih lai khan college 100 hnenah affiliation a pe a, pakhat zelah hian nuai li te a la ṭhin a ni" a ti. Singh leh a thurualpui te hi Thawhṭanni khan Varanasi-ah man an ni a, college principal Bachcha Roy pawh he thilah hian a inhnamhnawih nia hriat a ni. He thil hi May 30 aṭanga inṭan kha niin, topper Ruby Rai leh Saurabh Shreshta te mark hmuh hi belhsak an ni. Bihar Higher Secondary Education director Rajiv Kumar Prasad Ranjan chuan hemi chungchangah hian thubuai a ziak lut a ni. Amah hi College affiliation board member zinga mi a ni.

Police te chuan Singh hian Magadh University vice-chan-cellor Arun Kumar-a fapa Vivek Kumar a thurualpui niin an sawi. Police Arun Kumar-a chenna Patna an va pan hian amah hi a lo awm lo tih an sawi.