Prime Minister-in China pan

India Prime Minister Narendra Modi chuan nimin khan China a pan a, China President Xi Jinping leh Russia President Vladimir Putin te a hmu ang.

Vawiin hian Tashkent-ah Shanghai Cooperation Organisation summit neih a ni dawn a, he hun hmang tur hian Modi chuan China a pan. Modi hian China a cham chhung hian Nuclear Supplier Group nih tuma a beih mekna thlawp turin China president Xi Jinping inbiakna a neihpui dawn a ni. India foreign secretary Jaishankar chuan kar kalta khan Beijing tlawhin, India-in NSG member ni tura a beihna thlawp tur hian China palai te a lo dawr tawh a ni.

China chuan India-in NSG member ni tura a beihna hi a thlawp lo nia ngaih theih turin, NSG plenary meeting Seoul-a neih turah India member a nih leh nih loh chu an thupui tur a nih loh thu a lo sawi tawh. Hei bakah hian India chu NSG member-a lakluh a phu a nih chuan Pakistan pawhin a phu ve ngei a, pakhat member-a lakluh a nih chuan a dang pawh lakluh a ngai ang tiin a sawi a ni.

Modi hian India a let leh hma hian Russia president Putin a hmu bawk ang. Hetihlai hian Ministry of External Affairs-in a tarlan dan chuan, foreign secretary Jaishankar chuan Thawh-lehni khan Seoul a pan a, joint secretary Amandeep Gill leh ambassador to Korea Vikram Doraiswami te a hmuh rin a ni.

NSG plenary mee-ting neih turah hian Prime Minister Modi leh Jaishankar te hi an thawkrim hle. US bakah ram eng emaw zat chuan India-in Nuclear Supplier Group member ni tura an thlawp thu an sawi tawh.