Vawiinah Kejriwal leh a minister-te la lut dawn MLA-te chungah kan strict hle ang: Manish Sisodia

Delhi Chief Minister tur, Arvind Kejriwal chu vawiin hian Ramlila Ground-ah rinawmna thu tiamtir a lakluh a ni dawn a, a rualin cabinet minister turte pawh lakluh nghal an ni ang.

Ramlila Ground-a Kejriwal-a ruala lakluh tur mi parukte hming pawh AAP hian Lieutenant Governor Najeeb Jung hnenah a thawn tawh.

AAP hruaitu hlun, Manish Sisodia chu deputy chief minister a ni dawn a, ani bakah hian Satinder Jain, Gopal Rai, Jitendra Tomar, Sandeep Kumar leh Asim Ahmed Khan-te chu minister atan lakluh a ni bawk ang. Minister lakluh tur zingah hian Jain chauh hi AAP sorkar hmasaa minister lo ni tawh a ni a, a dangte chu MLA term khat an chelhna vek a ni.

Vawiina lakluh inkhawm neih turah hian AAP chuan mi tam tak a sawm a, Prime Minister Narendra Modi bakah union minister-te pawh an sawm. Mahse PM hian program duan lawk sa a neih avangin a tel thei dawn lo nia sawi a ni. Congress hruaitu Ajay Maken leh BJP chief minister candidate Kiran Bedi-te pawh sawm an ni bawk.

Deputy chief minister tur, AAP hruaitu Manish Sisodia chuan sorkar thar a din hunah MLA-te chungah pawh an strict dawn hle tih a sawi. Sisodia chuan a ṭul a nih chuan Chief Minister tur, Arvind Kejriwal nenin Delhi hmasawnna tur a nih chuan mipuite hnenah pawh sum an dil ang a, minister hlawhte pawh an tihniam mai dawn tih a sawi.

Assemby inthlan neih zawh taka hneh taka an party thlan tlin a nih chuan an lakah mipuite rinna an neih­zia a tilang a ni tiin, an laka thu an lo tiam tawhte chu tihhlawhtlin tuma an beih tur thu a sawi. Sisodia chuan, "AAP-in mipuite hnena thu a lo tiamte chu tihhlawhtlin theih vek a ni," a ti.

Manish Sisodia hi Rajput chhungkua a mi niin, 1972-a piang a ni. Journalism-ah post-graduate diploma a nei a, Zee News leh All India Radio-ahte a thawk ṭhin. Kum 2012-a Aam Aadmi Party din a nih khan Political Affairs Committee member-ah a awm a, 2013-a Delhi assembly inthlanah East Delhi bialah thlan tlin niin, education, PWD, urban development, local bodies leh land & building minister atan dah a ni.