Delhi-ah Kristian school suasam a ni
Delhi chhim lam, Vasant Vihar biala Kristian school chu nimin zing khan mi tu tih hriatlohte'n an suasam leh.
Police-te chuan school suasam hi Holy Child Auxilium a nih thu leh, school pawh hi nimin khan khar nghal a nih thu an sawi. Delhi Police commissioner BS Bassi chuan sakhaw thila inbeihna lam ni loin, rukrute thiltih nia a lan thu a sawi.
School suasam a nih chungchangah hian nimin khan Prime Minister Narendra Modi chuan Police Commissioner Bassi hi a ko nghal a, hnam leh sakhaw tlem zawkte bei ṭhintute lakah na taka action la turin a ti. PM chuan school beitute bakah, tun hnaia Kristian biak-in beitute zawng chhuak tur special team din turin Bassi a hrilh bawk.
Holy Child Auxilium School-a lut ṭhin, Human Resource Development Minister Smriti Irani pawhin nimin khan school hi a tlawh nghal a, school beih a nih dan chu chhuichiang turin Union Home Minister Rajnath Singh a ngen.
Delhi Chief Minister tur, Arvind Kejriwal pawhin zirna in beih a ni chu a dem thu a sawi.
School beitute hian CCTV camera ṭhenkhat an tichhia a, school principal office an suasam bakah donation box-a pawisa an ruchhuak bawk.
2011 census report-a a landanin Delhi khawpui chhunga cheng, mi maktaduai 17 zingah Kristian 130,000 an awm a, India ramah mi tluklehdingawn 1.2 zingah Kristian maktaduai 24 an awm.