Rel chesualah mi 11 an thi

Nimin zing khan Bengaluru aṭanga Enrakulam, Kerala pana tlan khualzin phur rel chu Anekal bulah a chesual a, mi 11 an thi a, midang 60 chuangin hliam an tuar.

Railway official-te chuan Bangalore City-Ernakulam Intercity Express hi relkawnga lung tla avangin a chesual a, rel pindan pakua a let niin an sawi.

Rel hi zing dar 6.15 khan Bengaluru aṭangin a tlanchhuak a, zing dar 7.35 ah Anekal Road leh Hosur inkar, Bangalore City-Salem Section-ah a chesual a, a chetsualna hi Bengaluru aṭang km 45-a hla a ni.

Union Railway Minister Suresh Prabhu chuan relkawng­ah lung a tla a, hei hi rel hian a su niin a sawi a, thil awmdan chu amah ngeiin a enfiah thu leh, state leh tualchhung thuneitute pawh a biakpawp thu a sawi. Prime Minister Narendra Modi pawhin chetsualna thleng chu pawi a tih thu sawiin, thi chhungte a tuarpui thu a sawi a, hliam tuarte pawh an dam thuai theihna atan duhsakna a hlan bawk. PM chuan thil awmdan chu official-te'n uluk taka an enzui thu a sawi bawk.

Railway Minister Prabhu chuan chetsualna thleng vanga thi chhungte hnenah ralna, cheng nuai hnih ṭheuh pek an nih tur thu leh, hliam tuar na zual hnenah Rs 50,000 leh na vak lote hnenah Rs 20,000 ṭheuh pek an nih tur thu a puang.