J&K-ah BJP leh PDP te'n inremna an siam thei dawn

14th February, 2015

Jammu and Kashmir-a ṭangrual sorkar thar siam turin BJP leh PDP chuan inremna an siam fel hnai tawh a, tun thla ni 23 hian inremna hi an tihfel theih beisei a ni.

Party pahnihte hi hun eng emaw chen thawhdun dan ngaihtuahin an inbe tawh a, an inhriatthiam lohna ṭhenkhatte chu an sawifel tawh. Hetihlai hian PDP-in Armed Forces Special Powers Act (AFSPA) tihnep a duh dan leh Pakistan nena ramri chungchanga a thil phut leh, common minimum program (CMP) ahte inremna an la siam thei lo.

Ṭangrual sorkara Chief Minister tur hian PDP chuan an party hotu, Mufti Mohammad Sayeed an thlang a, BJP hian deputy chief minister post a chang thung ang. Deputy CM atan hian Nirmal Singh dah rin a ni.

CMP chungchanga an inremna hi karleh chhung hian an sawifel theih beisei a ni tih BJP chuan a sawi.

Member 87 awmna assembly-ah hian PDP hian MLA 28 a nei a, BJP-in 25 a nei.