Swamy-a'n Subramanian beih chhunzawm zel a tum

Rajya Sabha-a BJP MP ni lai Subramanian Swamy chuan NDA sawrkarin Chief Economic Adviser Arvind Subramanian a beihna titawp turin hrilh mah se beih chhunzawm zel a tum thu chanchinthar thehdarhtute a hrilh.

Subramanian Swamy chuan Reserve Bank of India-a Governor tur anga Arvind Subramanian an sawi chu sawiselin, NDA sorkarin a beihna titawp se a duh rualin, amah chuan la beih chhunzawm zel a tum thung. Tuna RBI Governor, Raghuram Rajan-a term a zo ṭep a, term leh atan RBI governor nih a tum tawh lo tih a sawi chian hnuah Swamy hian Subramanian beihzui zel a tum thu hi a sawi a ni.

Arvind Subramanian hi RBI governor tur atana sawi rik zingah a tel a, hei hi BJP kaihhruai sorkar, NDA chuan a duh lo hle a ni. A duh lohna chhan hi kum 2013-a US leh India insumdawn tawnna tur kawngah US House Committee on Ways and Means hmaa a inlan ṭumin, US tana India a inhawn theih nan India company leh exporter-te chu thleibika thliarbik a ṭha ang tih a lo sawi vang a ni.

Swamy hian Finance Ministry-a officer pawimawh tak Economic Affairs Secretary, Shaktikanta Das pawh Finance Minister hmasa P.Chidambaram-a hunlaiin ram lei chung changah dik lo taka thil tiah puhin, BJP Party ngaihdan ni loin ama mimal ngaihdan a sawi chhuak niin a sawi. Ningania thuthar lakhawmtute a kawmnaah Dr. Swamy hian Union Finance Minister Arun Jaitley chungchang an zawhna chhangin "A duh duh lo sawi se, ani nen sawi dun tur kan nei lo, ka duh chuan Party President emaw prime Minister emaw ka be mai ang" tiin a sawi.

Nilaini khan Finance Minister Arun Jaitley chuan Subramanian Swamy-an Arvind Subra-manian ban tura a nawrna chung chang chu sawrkarin Chief Economic Adviser hi a ring tawk a, hun hrang hranga sawrkar thurawn a lo pek tawh ṭhinte chu a ṭangkai hle a ni tiin a lo sawi tawh a ni.