Sawizui hlawh International Yoga Day

International Yoga Day chu India ram state hrang hrangah lawm ni mah se Chandigarh, Bihar leh Kerala-ah te he ni hi lawm a ni lo.

Bihar deputy chief minister hlui Sushil Kumar Modi chuan, International Yoga Day June 21-a an state-a lawm a nih loh chhanah Chief Minister Nitish Kumar a puh a, Nitish chuan yoga project te a tihtawp a rin thu a sawi. Sorkar laipui chuan Bihar-ah hian Yoga Day lawm tur hian a lo hriattir tawh a, nikum pawh khan lawm a ni tawh lo.

Kerala-ah chuan Thiruvanan-thapuram Central Stadium-ah International Yoga Day hmanna pui ber neih a ni a, Kerala Health Minister K K Shailaja chuan a hmanpui. Shailaja hi yoga thlawp lotu zinga mi niin, Yoga session neih pawh a zawm ve lo. Yoga hian eng sakhua mah a nei lo, eng sakhaw ta mah a ni hek lo, tu pawhin Yoga chu tise kan sawisel tur a ni lo a, ti duh lo an awm a nih pawhin kan sawi theih a ni lo a ti.

Bihar-ah hian Nitish Kumar kaihhruai state sorkar chuan a lawmna hran a siam lo a, mipui ṭhahnemngai zual ten Patanjali Yogapeeth-ah International Yoga Day hi an lawm. Chief Minister bakah, deputy chief minister Tejaswi Yadav, education minister Ashok Chowdhary leh health minister Tej Pratap Yadav te chu Yoga thlawp lo langsar an ni.

Hetih lai hian Union minister Ravi Shankar Prasad chuan Patna-a Gandhi Maidan-ah Yoga Day lawmna hi a hmanpui. Prasad chuan chuan, Yoga hi min ṭhendarhtu ni loin, inunauna thlentu a ni a ti. Yoga hian politics nen inzawmna a nei lo tih sawiin, keimah anga hlim a duh a nih chuan Nitish Kumar hian ka hnung rawn zui rawh se tiin Yoga chu a fak mawi.

BJP MLA Sanjeev Chaurasia chuan, "Yoga chu chi leh kuang thil a nih avangin state sorkar chuan hman loh hi a duh a ni, India ramah chuan Yoga leh poilitics chu chawhpawlh a ni" a ti.

Bihar chief minister Nitish Kumar chuan, an state-ah yoga kalpui a nih hmain zu khap a ni a ti a, Modi'n BJP rorelna state-a Yoga kalpui a nih theih nana zu dawr khar tura thurawn a pek avanga khar an nih loh thu a sawi. BJP sorkar-in Yoga a ngaih pawimawh em avangin Prime Minister chuan an sorkarna state zawng zawng zu dawr te chu a khar vek a rin thu a sawi bawk. Hetih lai hian Chandigarh Congress hruaitu Inderjeet Singh Zira chuan "Prime Minister Yoga Day " tiin a lo sawi ve bawk.

Uttar Pradesh-ah pawh rorel lai Samajwadi Party chuan International Yoga Day hi an boycott. State sorkarin a lawmna buatsaih lo mah se hmun
ṭhenkhatah chuan lawm a ni tho a, Union ministers Rajnath Singh, Maneka Gandhi, Kalraj Mishra leh V.K. Singh te chuan an hmanpui.