Prashant Kishor-a'n Oct 2-ah political party din dawn

Political strategist-turned-activist Prashant Kishor chuan October 2, 2024, Gandhi Jayanti-ah political party a din chu a tlangzarh dawn.

Kishor hian kum hnih liam ta aṭanga Bihar-a campaign a kalpui, Jan Suraaj chu political party-ah a din chho dawn a ni. "Kan lo sawi tawh angin, October 2-ah Jan Suraaj chu political party a ni tawh dawn a, nakkum assembly inthlanah pawh a chuh tawh ang. Party hruaitu chungchang chu lo puan leh ani ang," tiin Thawhaṭannia Patna-a Jan Suraaj 'state level workshop' an neihah a sawi.

Indian Political Action Committee (I-PAC) dintu, Kishor chuan Jan Suraaj chu Bihar-a Muslim ten an thlawp ṭha hle niin a sawi. 2025 Bihar assembly inthlanah an chuh dawn a, hemi hunah hian Extremely Backward Classes (EBC) category aṭangin candidate 75 tal dah an tum tih a sawi bawk. Bihar-ah hian assembly seat hi 243 a awm a ni.

Kishor hi politician lar tak takte tan poll strategist lo ni tawhin, an zingah hian prime minister Narendra Modi, West Bengal chief minister Mamata Banerjee, Bihar chief minister Nitish Kumar leh Delhi chief minister Arvind Kejriwal te pawh an tel.

Jan Suraaj hi political party anga tlangzarh a nih hma hian Bihar chief minister hlui, Karpoori Thakur tupa, Jagriti Thakur chuan a zawm tawh a, JD(U) leader Mangani Lal Mandal fanu Priyanka pawhin a zawm tawh bawk. RJD MLC hlui, Rambali Singh Chandravanshi leh IPS officer hlui, Anand Mishra te pawh lak luh an ni tawh a ni.

Kishor hian 2021 West Bengal assembly inthlan zawh aṭang khan political consultancy hi a bansan a ni.