Delhi CM thar atan Kejriwal-a lakluh a ni ta

Delhi Chief Minister thar atan Aam Aadmi Party (AAP) convener, Arvind Kejirwal-a chu kar kalta Inrinni khan Delhi-a Ramlila Ground-ah rinawmna thu tiam tira lakluh a ni. A rual hian deputy chief minister-ah Manish Sisodia leh minister paruk lakluh an ni bawk.

Delhi CM leh minister tharte hi Delhi Lieutenant Governor Najeeb Jung-a'n rinawmna thu a tiam tir a, lakluh inkhawmah hian mi 50,000 chuang an tel. Minister atana lakluhte chu Asim Ahmed Khan, Sandeep Kumar, Satyendra Jain, Gopal Rai leh Jitender Singh Tomar an ni.

AAP hian Delhi sorkar thar lakluhnaah hian Prime Minister Narendra Modi, union minister te, BJP leh Congress hruaitute pawh an sawm a, mahse tumah an tel lo.

CM atana lakluh a nih hnua a thusawi hmasak berah, Kejriwal chuan sorkar thar lakluh inkhawma telte hnenah lawmthu a sawi a, Delhi chu India rama eiruk awm lohna state hmasa bera siam an tum thu a sawi. Eiruk umbona atan thamna inpek leh intlawn lungawi chingte pawh man zel an nih tur thu a sawi a, hemi kawngah hian mipuite ṭawiawmna leh thawhpuina an mamawh tih a sawi.

VIP culture tihtawp ngei a tum chu sawi nawn lehin, Kejriwal-a chuan politician-te'n mipui nawlpuite aia hamṭhatna tam tak an neih ṭhin chu tihtawp a ni ang, a ti. Kejriwal-a chuan, "Ram changkangahte chuan PM ngeite pawhin bus-stand-ah an nghak ve mai a, chutiang chu kan ramah pawh engvangin nge kan tih theih loh ang?" tiin, VIP culture chu tihtawp a ngai tawh a ni, a ti.

Inrinni vek khan Kejriwal-a hian a minister-te chanpual tur hi a siamfel nghal. Chief Minister hian department chan bik a nei dawn lo a, department hrang hrangte hnathawh dangte chu enpuiin, an hna kalpui dante a enfiah ṭhin ang.

Kejriwal chuan CM-in ministry chan bik a neih chu ṭha a tih loh thu sawiin, state-in harsatna a neihte chinfel dan siam a, a taka kalpui a nih theih dan turte ngaihtuaha a insawrbing a ngai a ni, a ti.

Deputy Chief Minister Manish Sisodia chuan Education, Finance, Planning leh Revenue a chang dawn a, Satyendar Singh-an Power, Health, Industries leh PWD department a chang ang.

Gopal Rai chuan Transport, Labour and Employment department a enkawl dawn a, Sandeep Kumar-a'n Women and Child Development, Social Welfare leh SC & ST department changin, Asim Ahmeh Khan-a'n Food, Civil Supply, Environment and Forests department a chang ang a, Law and Justice, Home leh Tourism chu Jitender Singh Tomar-a'n a enkawl dawn a ni. Minister hrang hrange hian an hna chanpual ṭheuhah charge an la nghal.