Hazare-a'n nawrh huaihawt a tum

Eirukna dotu, Anna Hazare chuan February 23 leh 24 hian Jantar Mantar-ah Prime Minister Narendra Modi-a kaihhruai sorkarin Land Acquisition, Rehabilitation, and Resettlement Act a siam danglam chung­changah lungawi lohna lantir a tum.

Kum 2014, December 29 khan sorkar laipui chuan Land Acquisition, Rehabilitation, and Resettlement Act hi thlak danglamin, private leh sorkar project kalpuina tura ram laknaah a tuartu tur loneitute remtihna, 80% chin tal lak ngai ṭhin chu tihtawp a ni. Hei hi sawiselin Hazare chuan he dan siamṭhat hi loneitute ngaihthahna leh, mi hausate duhsakna lantirna a ni, a ti.

Sorkarin loneitute ngaihthah zawnga dan thar a siam hi a duh lohna lantirin, Hazare hian ni hnih chhung nawrh huaihawt a tum thu hi a sawi. Nawrh huaihawt a tum hi activist hrang hrangte chuan an thlawp tur thu an sawi a, loneitu pawl hrang hrang pawhin tel an tum. Hazare thlawp tumtu zingah hian Maharashtra-a BJP kaihhruai ṭangrual pawla tel, Swabhimani Shetkari Sangathna (SSS) pawh a tel.

Hazare chuan sorkar laipui chu a dan thlak danglamte sut leh turin an ngen dawn tih a sawi a, he dan thar hmang hian loneitu rethei zawkte chu awlsam taka tihchhiat theih an ni dawn a ni, a ti.