Vote lak hma chuan ka bang dawn lo: Bihar CM

17th February, 2015

Bihar Chief Minister Jitan Ram Manjhi chuan rorellai, Janata Dal United MLA-te'n bang turin nawr reng mah se, February20-a House-a amah fiahna neih a nih hma chuan CM aṭanga ban a tum loh thu a sawi.

Manjhi chuan CM thar atana dah an tum, JD(U) hruaitu Nitish Kumar chuan amah thlawptu MLA-te chu koin a vau niin a sawi bawk.

Kar hmasa khan Nitish Kumar hian JD(U) MLA 130 te hruaiin New Delhi-ah President Pranab Mukherjee a hmu a, President hnenah hian member 243 awmna Bihar Assembly-ah sorkar siam thei turin thlawptu MLA a ngah tawk tih a hrilh.

Bihar Chief Minister hlui, Nitish Kumar hi nikuma Lok Sabha inthlanpui neihah an party an chet chhiat avangin CM aṭanga bangin, a aiah Manjhi hi a dah a ni. Mahse kumin kumtawp lamah assembly inthlan an neih dawn avangin an party MLA tam zawk chuan Kumar-a kaihhruaina hnuaiah inthlan hi hmachhawn an duh a, hei vang hian Manjhi hi bantir a, a aiah Nitish Kumar hi CM tir leh an tum.

Manjhi chuan Nitish-a'n Bihar CM atana amah thlaktu atana a lo thlang chu a tihsual lian tak a ni tih sawiin, CM aṭanga a bang kha a tisual a ni, a ti. Nitish chuan amah chu a hlau a, hei vang hian debate neih tur lak aṭang pawn a tlanchhe zel tih a sawi bawk. "A duh angin min thunun thei lo a, keima duhthlanna anga thutawp ka siam ṭhin aṭang khan Nitish hian a hlauthawng ta a ni," a ti.

Assembly ṭhiah emaw, President's rule puang tura rawtna siam tumna emaw a neih loh thu Manjhi chuan a sawi a, House-a fiahna a paltlang thei lo a nih chuan a bang mai dawn tih a sawi.

Manjhi hi fiah a nih hunah BJP MLA-te'n an thlawp dawn nia sawi a nih hnuin, central lama BJP hruaitute chuan inrawlh loh an rel leh ta zawk nia sawi a ni. BJP in a thlawp loh chuan Manjhi hian fiahna hi a paltlang zo dawn lo a ni.

CM fiah ni tur, February 20 hi budget session ṭanni tura lo duan lawk tawh a nih avangin hemi ni hian assembly leh legislative council joint sitting hmaah Governor chuan thu a sawi dawn a, a thusawi zawhah trust vote chungchanga debate neih a ni ang. Nitish Kumar hi legislative assembly member a nih loh avangin hemi lai hian a awm ve phalsak a ni dawn lo a, Speaker-in JD(U) legislature party hotu atana a ruatna chu Patna High Court chuan a lo hnawlsak tawh a ni.